ޗާގޯސް މައްސަލާގައި މޮރިޝަސްއަށް ފޮނުވި ސިޓީ އަނބުރާ ގެންނަން ރައީސް ނިންމަވައިފި

ރާއްޖޭގެ އިގްތިސާދީ ސަރަހައްދުގެ މައްސަލައިގައި މިދިޔަ ސަރުކާރުން މޮރިޝަސްގެ ބޮޑު ވަޒީރަށް ފޮނުއްވި ސިޓީ އަނބުރާ ގެންނަން ނިންމާފައިވާކަން ރައީސް ޑރ. މުޙައްމަދު މުޢިއްޒު ރަސްމީކޮށް އިއުލާނުކުރައްވައިފިއެވެ.

ރައީސް އެކަން އިއުލާނުކުރެއްވީ މި އަހަރުގެ ރިޔާސީ ބަޔާން އިއްވަމުންނެވެ. މި ނިންމުން ނިންމާފައިވަނީ އެ ސިޓީގެ ސަބަބުން ދިވެހިރާއްޖޭގެ ސިޔާދަތީ ސަރަހައްދުގެ ރައްކާތެރިކަމަށް ނޭދެވޭ އަސަރުކޮށްފައިވާކަމަށް ބައިނަލްއަގުވާމީ މާހިރުންގެ ލަފާ ލިބިފައިވާތީ ކަމަށް ރައީސް ވިދާޅުވިއެވެ.

ޗާގޯސް މައްސަލާގައި ކުރީގެ ސަރުކާރުން ގެންގުޅުނު ސިޔާސަތަށް ބަދަލު ގެނައުމަކީ މި ސަރުކާރުގެ މުހިންމު ވައުދެކެވެ. މި ސިޓީ އަނބުރާ ގެންދިއުމާއެކު، ރާއްޖޭގެ ކަނޑުގެ ސަރަހައްދު ހިމާޔަތްކުރުމަށް ކުރަމުންދާ މަސައްކަތްތަކަށް އިތުރު ބާރެއް ލިބިގެންދާނެ ކަމަށް ބެލެވެއެވެ.