ދެމަފިރިންގެ ބޯހިޔާވަހިކަމެއް އޮތަސް ގޯއްޗަށް އެދި ކުރިމަތިލެވޭ ގޮތަށް ހުޅުވާލާނެ: ރައީސް

ދިވެހި އާއިލާއެއްގެ ބޯހިޔާވަހިކަމެއް އޮތް ނަމަވެސް، ގޯއްޗަށް ކުރިމަތިލެވޭ ގޮތަށް ވަރަށް އަވަހަށް ފުރުސަތު ހުޅުވާލާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާނު ކުރައްވައިފިއެވެ.

ރައީސް މިކަން ހާމަކުރެއްވީ މިއަހަރުގެ ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.

ރައީސް ވިދާޅުވީ ގޯތިގެދޮރުގެ ތަނަވަސްކަން ހޯދުމުގެ ފުރުސަތު ފަހިކޮށްދިނުމުގެ ގޮތުން ވަކި ކެޓަގަރީއެއްގެ ގޮތުގައި ތިމާގެ އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ކުރިމަތިލެވޭނެ ގޮތަށް ވަރަށް އަވަހަށް ހުޅުވާލާނެ ކަމަށެވެ. މިއީ ބޯހިޔާވަހިކަމުގެ ދަތިކަން ހުރި އާއިލާތަކަށް ލުއިފަސޭހަކޮށްދިނުމަށް ނިންމެވި ނިންމެވުމެއް ކަމަށް އެމަނިކުފާނު ފާހަގަކުރެއްވިއެވެ.

މީގެ އިތުރުން، 2022 ވަނަ އަހަރު ހުޅުވާލެވުނު "ބިންވެރިޔާ" ސްކީމުން ޖޮއިންޓްކޮށް ގޯތި ލިބުނު މީހުންނަށް ވެސް އާ ފުރުސަތެއް ދިނުމަށް ވަނީ ނިންމާފައެވެ. ރައީސް ވިދާޅުވީ ޖޮއިންޓްކޮށް ގޯތި ލިބިފައިވާ ހުރިހާ އެންމެން އެ ގޯތި އެއްކޮށް ދޫކޮށްލަން އެއްބަސްވާ ނަމަ، ޖޮއިންޓްކޮށް ލިބުނު ކޮންމެ މީހަކަށް ވަކި ގޯއްޗެއް ލިބޭ ގޮތަށް ވަކި ކެޓަގަރީއެއް ހުޅުވާލާނެ ކަމަށެވެ.

ސަރުކާރުން ކަނޑައަޅާފައިވާ 15,000 ގޯތީގެ ތެރެއިން މި ދެ ކެޓަގަރީން ކޮންމެ ކެޓަގަރީއަކަށް 1,000 ގޯތި ހާއްސަކޮށްފައިވާނެ ކަމަށް ރައީސް ވިދާޅުވިއެވެ. "15,000 ގޯތީގެ ތެރެއިން މި ދެ ކެޓަގަރީން ކޮންމެ ކެޓަގަރީއަށް 1,000 ގޯތި ކަނޑައަޅާފައިވާނެ،" ރައީސް ވިދާޅުވިއެވެ.

ރަސްމާލޭގެ ބޯހިޔާވަހިކަމުގެ މަޝްރޫއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ 15,000 ގޯތި ދޫކުރުމަށް ހަމަޖެހިފައިވާ ރަސްމާލޭގެ ބިން ހިއްކުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ. ސަރުކާރުގެ އަމާޒަކީ މި އަހަރުގެ އޭޕްރީލް މަހުގެ ނިޔަލަށް ރަސްމާލެ ބިން ހިއްކައި އެއްކޮށް ނިންމާލުން ކަމަށް ވެސް އެމަނިކުފާނު ވިދާޅުވިއެވެ.