މިދިޔަ އަހަރު އިސްލާމީ ދާއިރާއިން 90 މަޝްރޫޢެއްގެ މަސައްކަތް ކުރިއަށްގެންދިޔަ: ރައީސް

މިދިޔަ އަހަރު އިސްލާމީ ދާއިރާއިން ޖުމުލަ 90 މަޝްރޫޢެއްގެ މަސައްކަތް ކުރިއަށްދިޔަކަމަށާއި، ކުރިއަށް އޮތް ރަމަޟާން މަހަށް ރާއްޖޭގެ އެކި ސަރަހައްދުތަކުގައި އަލަށް ބިނާކުރި 8 މިސްކިތެއް ހުޅުވޭނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވީ މިއަހަރުގެ ރައްޔިތުންގެ މަޖިލީސް ހުޅުވުމަށް މިއަދު ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.

ރައީސުލްޖުމްހޫރިއްޔާގެ ބަޔާނުގައި ފާހަގަކުރެއްވި ގޮތުގައި، އިސްލާމްދީނުގައި އެންމެ މަތިވެރި ބިނާތަކަކީ މާތްﷲގެ ގެކޮޅު ކަމަށްވާ މިސްކިތްތަކެވެ. ސައްތައިންސައްތަ އިސްލާމީ ޤައުމެއްގެ ގޮތުގައި ރާއްޖޭގެ މިސްކިތްތަކުން އިސްލާމީ ޙަޟާރަތުގެ ރީތިކަން ފެންނަންވާނެ ކަމަށް އެމަނިކުފާނު ވިދާޅުވިއެވެ. އެގޮތުން މިދިޔަ އަހަރު 74 މިސްކިތާއި، 7 އިސްލާމީ މަރުކަޒާއި، 3 ޤުރުއާން މަރުކަޒު އަދި 6 ވަޤްފް ބިނާއެއް ހިމެނޭހެން 90 މަޝްރޫޢެއްގެ ޢަމަލީ މަސައްކަތް ކުރިއަށްދިޔަކަން ރައީސް ފާހަގަކުރެއްވިއެވެ.

މިދިޔަ އަހަރުގެ ތެރޭގައި ހއ. ދިއްދޫ އިސްލާމިކް ސެންޓަރާއި 10 ރަށެއްގެ މިސްކިތް ނިންމާ ހުޅުވާފައިވާކަން ރައީސް ފާހަގަކުރެއްވިއެވެ. އަދި މިހާރު ބޭނުންކުރަމުންދާ މިސްކިތްތައް މަރާމާތުކުރުމަށް މިދިޔަ އަހަރު 19 މިލިއަނަށްވުރެ ގިނަ ރުފިޔާ ޚަރަދުކޮށްފައިވާއިރު، މިއަހަރު އެކަމަށް 15 މިލިއަން ރުފިޔާ ބަޖެޓުކޮށްފައިވާ ކަމަށް އެމަނިކުފާނު ވިދާޅުވިއެވެ.

ކީރިތި ޤުރުއާން ހިތުދަސްކުރާ ޙާފިޒުންނަށް ދޭ އެލަވަންސް 2،000 ރުފިޔާއިން 4،000 ރުފިޔާއަށް މިދިޔަ އަހަރު ވަނީ އިތުރުކޮށްފައެވެ. ރައީސް ވިދާޅުވި ގޮތުގައި މިދިޔަ އަހަރަކީ ރާއްޖޭގެ ތާރީޚުގައިވެސް އެންމެ ގިނަ ޙާފިޒުން ދަސްވެނިވި އަހަރެވެ. މީގެ އިތުރުން، 2028 ވަނަ އަހަރުގެ ނިޔަލަށް މީހުން ދިރިއުޅޭ ކޮންމެ ރަށެއްގައި ޤުރުއާނާ ބެހޭ މަރުކަޒެއް ހުޅުވުމުގެ މަސައްކަތް މިދިޔަ އަހަރު ފަށާފައިވާ ކަމަށްވެސް އެމަނިކުފާނު ވިދާޅުވިއެވެ.

ޤުރުއާނާ ބެހޭ ކަންކަމަށް ދެމެހެއްޓެނިވި ގޮތެއްގައި ފައިސާ ހޯދުމަށް މާލޭގައި ޚާއްޞަ ވަޤްފު ޢިމާރާތެއް އެޅުމުގެ މަސައްކަތް މިއަހަރު ފެށޭނެ ކަމަށް ރައީސް އިޢުލާންކުރެއްވިއެވެ. އަދި ޤައުމީ ޤުރުއާން މުބާރާތުން އެއްވަނަ ހޯދާ ފަރާތަކަށް، ބޭނުން ދާއިރާއަކުން ޕީ.އެޗް.ޑީ އާ ހަމައަށް ކިޔެވުމުގެ ސްކޮލަރޝިޕެއް ދޭން ފަށާފައިވާކަންވެސް އެމަނިކުފާނު ފާހަގަކުރެއްވިއެވެ. ހަމައެއާއެކު، ޙައްޖުވެރިންނަށް ލުއިފަސޭހަކޮށްދިނުމަށް 'މައްކާ ރޫޓް އިނީޝިއޭޓިވް' ތައާރަފްކޮށްފައިވާކަންވެސް ރިޔާސީ ބަޔާނުގައި ފާހަގަކުރައްވާފައިވެއެވެ.