ހުއްދަ ނަގަންޖެހޭނީ ގޮނޑި މޭޒު ބަހައްޓާނަމަ އެކަނި: އެޗްޑީސީ

ހުޅުމާލެ ސެންޓްރަލް ޕާކާއި ބީޗު ފަދަ ސަރަހައްދުތަކުގައި ޕިކްނިކް ހެދުމަށް އެޗްޑީސީގެ ހުއްދަ ނަގަން ޖެހެނީ ގޮނޑިމޭޒު ބަަހައްޓާނަމަ އެކަނި ކަމަށް އެ ކުންފުނިން ބުނެފިއެވެ.

ދުރާލައި ހުއްދަ ނުނަގައި ސެންޓްރަލް ޕާކް ބޭނުންނުކުރެވޭނެ ކަމަށް އެޗްޑީސީގެ އޮފިޝަލުންތަކެއް އެންގި ކަމަށް ބުނެ ސޯޝަލް މީޑިއާގައި ދަނީ އެ ކުންފުންޏާ ގުޅޭގޮތުން ތަފާތު ވާހަކަތައް ދެކެވެމުންނެވެ.

މިކަމާ ގުޅޭގޮތުން އެޗްޑީސީގެ މާކެޓިން އެންޑް ޕީއާރު ޑިޕާޓްމަންޓްގެ ހެޑް ހަސަން ޝަހީދު "ނުކުތާ"އަށް ވިދާޅުވީ ސެންޓްރަލް ޕާކްގައި ގޮނޑި މޭޒު ބަހައްޓާނަމަ ހުއްދަ ނަގަންޖެހޭގޮތަށް ނިންމީ ސާފުތާހިރުކަން ބެލެހެއްޓުމުގެ ގޮތުން ކަމަށެވެ.

ޝަހީދު ވިދާޅުވީ އެ ކުންފުނިން ކަނޑައަޅާފައިވާ އާންމު ތަންތަން ކުއްޔަށް ދޫކުރުމާއި ބޭނުންކުރުމުގެ ގައިޑްލައިންގައިވާގޮތުން އާންމު ތަންތަނުގައި ޕަބްލިކް ޕިކްނިކް ހެދުމަކީ ހުއްދަ ކަމެއް ކަމަށެވެ. އެފަދަ ކަންކަން ކުރާއިރު، ހަމައެކަނި ހުއްދަ ނަގަންޖެހޭނީ ގޮނޑި މޭޒު ބަހައްޓާނަމަ އެކަނި ކަމަށް ވެސް އޭނާ ވިދާޅުވިއެވެ.

ހުޅުމާލެ މަގަކަށް ކުނި އަޅާފައި

"އެ ތަންތަނުގައި ގޮނޑި މޭޒު ނުބަހައްޓަންޏާ، ނޫނީ ފޮޓޯބެކްޑްރޮޕް ފަދަ އެއްޗެއް ނުބަހައްޓަންޏާ، ހަމަ ކޮންމެ ބަޔަކަށް ވެސް ޕިކްނިކް ހެދުމަށާއި އާއިލާއާއި ރައްޓެހިންގެ އެއްވުންތައް ހުއްދަ ހޯދުމަކާ ނުލާ ބޭއްވޭނެ،" ޝަހީދު ވިދާޅުވިއެވެ.

ޝަހީދު ވިދާޅުވީ ހުޅުމާލެ ސާފުތާހިރުކޮށް ބޭއްވުމަށްޓަކައި ކުރަންޖެހޭ ކަންކަން އެ ކުންފުނިން ކުރާނެ ކަމަށެވެ. އެހެންކަމުން ޕާކުތަކާއި ބީޗުތައް ހަޑިވާނެ ގޮތަށް އަމަލުކުރާނަމަ، އަންގަންޖެހޭ ކަންކަން އެންގުމަކީ އެ ކުންފުނީގެ މުވައްޒަފުންގެ މަސްއޫލިއްޔަތެއް ކަމަށް ވެސް އޭނާ ވިދާޅުވިއެވެ.

"އެ މުވައްޒަފުންގެ މަސްއޫލިއްޔަތު އަދާކުރުމުގެ ގޮތުން، ބައެއް ފަހަރު ކަންކަން ސާފުކުރުމަށާއި ބައެއް ކަންކަމުގެ އިރުޝާދު ދިނުމަށް އާންމުންގެ ގާތަށް ގޮސްދާނެ. އެއީ ތަނުގެ ސާފުތާހިރުކަމަށާއި ރައްކާތެރިކަމަށް ކުރަމުންދާ މަސައްކަތެއް،" ޝަހީދު ވިދާޅުވިއެވެ.