އޮޅު ހިޔާ ފެސިލިޓީއަށް މިހާތަނަށް ގެންދެވުނީ 30 ބުޅާ

ހުޅުމާލޭގައި ގާއިމްކޮށްފައިވާ "އޮޅު ހިޔާ"އަށް މިހާތަނަށް ގެންދެވުނީ 30 ބުޅާ ކަމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މިއަދު ބުނެފިއެވެ.

މާލޭ ސިޓީ ކައުންސިލުން ގާއިމްކުރި އެ ފެސިލިޓީ މިދިޔަ ފެބްރުއަރީ މަހުގެ 26 ވަނަ ދުވަހު މިނިސްޓްރީގެ ދަށަށް ގެންގޮސް މާލެ ސަރަހައްދުގައި އުޅޭ ބުޅާތައް ގެންދަން ފެށިއެވެ. އެގޮތުން މިހާތަނަށް އެ ފެސިލިޓީއަށް 30 ބުޅާ ގެންދެވިފައިވާ ކަމަށް އެ މިނިސްޓްރީން ބުންޏެވެ.

އެ ފެސިލިޓީން ކުދި ބުޅާތައް ނުކުންނާތީ، މިހާރު ހަރުކޮށްފައިވާ ދާގަނޑު މަތިން އިތުރު ދާގަނޑެއް ހަރުކޮށް މިނިސްޓްރީން ވަނީ އެކަން ހައްލުކޮށްފައެވެ.

ހުޅުމާލޭގައި ބުޅަލަށް ޚާއްސަ ފެސިލިޓީއެއް ހަދަން ނިންމީ މާލެ ސަރަހައްދުގައި ބުޅާތައް ގިނަވެ ހިނގާ ބިނގާވެ އުޅޭ މީހުންނަށް ދަތިތަކާ ކުރިމަތިލާންޖެހޭތީއެވެ.