ވީއައިއޭ ތަރައްގީ ކުރަން ސައުދީ ފަންޑުން 17 މިލިއަން ޑޮލަރު

ވެލާނާ އިންޓަރނޭޝަނަލް އެއާޕޯޓް ތަރައްގީ ކުރުމަށް ސައުދީ ފަންޑުން ދޭ ލޯންގެ އެއްބަސްވުމުގައި ދިވެހި ސަރުކާރާއި، ސަޢޫދީ ފަންޑް ފޯ ޑިވެލޮޕްމެންޓާއިއެކު ސޮއިކޮށްފިއެވެ.

މިއަދު ހެނދުނު ރައީސް އޮފީހުގައި ބޭއްވި ރަސްމިއްޔާތުގައި ރައީސް ޑރ މުހައްމަދު މުއިއްޒު ބައިވެރިވެވަޑައިގަންނަވައިފައިވާއިރު ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފިނޭސް މިނިސްޓާ މޫސާ ޒަމީރެވެ. އަދި، ސައުދީ ފަންޑުގެ ފަރާތުން ސޮއިކުރެއްވީ ސީއީއޯ ނިޝާން މުލީގޭ އިއްޒަތުގެ ވެރިޔާ ސުލްތާން ބިން އަބްދުއްރަހްމާން އަލްމުރްޝިދެވެ.

ވެލާނާ އިންޓަރނޭޝަނަލް އެއާޕޯޓް އެކްސްޕޭންޑު ކުރުމަށް ހިންގާ މި ޕްރޮޖެކްޓަށް އިތުރު އެހީގެ ގޮތުގައި ދިނުމަށް ހަމަޖެހިފައި ވަނީ 63،750،000.00 (ފަސް ދޮޅަސް ތިން މިލިއަން ހަތް ސަތޭކަފަންސާސް ހާސް) ސައުދީ ރިޔާލްއެވެ. އެއީ 17 މިލިއަން ޑޮލަރު ނުވަތަ 262 މިލިއަން ރުފިޔާއެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ މި ޕްރޮޖެކްޓް ނިމުމާއިއެކު، ރާއްޖެއަށް އިގްތިސާދީ ގޮތުން ގިނަގުނަ ފައިދާތަކެއް ލިބިގެންދާނެ ކަމަށެވެ. އެގޮތުން ފަތުރުވެރިކަމާއި، ވިޔަފާރި އަދި ދަތުރުފަތުރުފަދަ ގިނަ ސިނާއަތްތަކަކަށް އިތުރު ކުރިއެރުންތަކެއް ލިބިގެންދާނެ ކަން ވެސް ފާހަގަ ކުރެއްވިއެވެ.