ބައިބަލާ ޗެމްޕިއަން ޓީއެފްޓީގެ ކާމިޔާބީ ފާހަގަކުރަން މާލޭގައި ހަވާ އަރުވަނީ

މި އަހަރުގެ ބައިބަލާ މުބާރާތުގެ ޗެމްޕިއަންކަން ކާމިޔާބުކުރި ޓީއެފްޓީ ޓީމުގެ ކާމިޔާބީ ފާހަގަކުރަން މާދަމާ ހަވާ އެރުވުމާއެކު، ޚާއްސަ ހަފްލާއެއް ބާއްވަން އެ ޓީމުން ނިންމައިފިއެވެ.

ޓީއެފްޓީގެ ކާމިޔާބީ ފާހަގަކުރުމުގެ ހަފްލާ އޮންނާނީ މާދަމާ ރޭ އުސްފަސްގަނޑުގައެވެ. މި ހަފްލާގެ ތެރެއިން 23:30 އިން ފެށިގެން ތިން މިނެޓަށް ހަވާ އެރުވުމަށް ވަނީ ހަމަޖެހިފައެވެ.

މީގެ އިތުރުން ވެސް މި ހަފްލާގައި ގިނަ ހަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. އެގޮތުން، ލައިވް މިއުޒިކާއި، ބޮޑުބެރުގެ ހަރަކާތްތައް ވެސް އޮންނާނެ ކަމަށް އެ ކްލަބުން ބުނެއެވެ.

ޖުމްލަ 29 ޓީމު ވާދަކުރި މި އަހަރުގެ އީދު ބައިބަލާ ޗެލެންޖު ޓީއެފްޓީން ކާމިޔާބުކުރީ ފައިނަލުގައި ލޮރެންޒޯ ބަލިކޮށްގެންނެވެ. މިއީ އެ ޓީމުން މި މުބާރާތް ކާމިޔާބުކުރި ފުރަތަމަ ފަހަރެވެ.