ފުލުހުންގެ ތަމްރީނުގައި އުޅެނިކޮށް ނިޔާވި ގާއިސް އުފަން ރަށުގައި ވަޅުލައިފި

ދ. ވާނީގައި ފުލުހުންގެ ތަމްރީނު ހަދަން ގޮސް އުޅެނިކޮށް ނިޔާވި ހުސައިން ގާއިސް އުފަން ރަށުގައި ވަޅުލައިފި އެވެ.

އިއްޔެ އައިޖީއެމްއެޗުގައި ފަރުވާ ދެމުން ދަނިކޮށް ނިޔާވީ އުމުރުން 34 އަހަރުގެ ޕޮލިސް ކޮންސްޓަބްލް ހުސައިން ގާއިސް އެވެ. ގާއިސް ވަޅުލައިފައިވަނީ އޭނާގެ އުފަން ރަށް ސ.ހުޅުދޫގައި މިއަދު ހެނދުނު އެވެ.

މިދިޔަ އާދިއްތަ ދުވަހުގެ ފަތިހު 4:21 ހާއިރު ވާނީގައި ހުންނަ ޕޮލިސް ޓްރެއިނިން ސެންޓަރުގައި ދަރިވަރުންނަށް ގޮވަމުން ދިޔައިރު ގާއިސްގެ ޚަބަރެއް ނެތި އޮތްކަން ފާހަގަވެގެން 4:27ގައި މެޑިކަލް ރޫމަށް ގެންގޮސް އަވަސް ފަރުވާ ދޭން ފެށި ކަމަށް ފުލުހުން ބުންޏެވެ.

ޑޮކްޓަރުގެ ލަފާގެ މަތިން 4:48ގައި އިތުރު ފަރުވާއަށް އޭނާ ދ. އަތޮޅު ހޮސްޕިޓަލަށް ގެންދިޔައެވެ. އަދި އެއަށްފަހު އެ ދުވަހުގެ 13:22ގައި އެއާ އެމްބިއުލާންސްގައި އޭނާ މާލެ ގެނެސް އައިޖީއެމްއެޗްގައި ފަރުވާދޭން ފެށިއެވެ. މާލެ ގެނައިގޮތަށް އޭނާއަށް ފަރުވާދޭން ފެށީ ވެންޓިލޭޓަރުގެ އެހީގައެވެ.