ރާއްޖޭގައި ޑައިވް ކުރަން އުޅުނު އިނގިރޭސި ދެމަފިރިއަކު މަރުވެއްޖެ

ރާއްޖޭގައި ހިނގި ސްކޫބާ ޑައިވިން އެކްސިޑެންޓެއްގައި، އުމުރުން ދުވަސްވީ އިނގިރޭސި ދެމަފިރިއަކު މަރުވެއްޖެއެވެ.

މިދެމަފިރިންގެ ތެރެއިން 70 އަހަރުގެ އަންހެން މީހާ މަރުވެފައިވަނީ މިދިޔަ ޑިސެމްބަރު މަހުގެ 19 ވަނަ ދުވަހުއެވެ. އަދި 71 އަހަރުގެ ފިރިހެން މީހާ މަރުވެފައިވަނީ ހޮސްޕިޓަލުގައި ފަރުވާ ދެމުންދަނިކޮށް އޭގެ ތިން ދުވަސް ފަހުން މިދިޔަ މަހުގެ 22ވަނަ ދުވަހުއެވެ.

މި ދެމަފިރިންނަކީ ރާއްޖެއަށް މިހާރު ގާތްގަޑަކަށް 60 ފަހަރު ޒިޔާރަތްކޮށްފައިވާ ބަޔެކެވެ. އަދި ރާއްޖޭގައި މިދިޔަ 17 އަހަރު އެކީ ކްރިސްމަސް ފާހަގަކޮށްފައިވެސްވެއެވެ.

އެންމެ ގިނައިން މިދެމަފިރިން ގޮސް އުޅުނީ އއ. އެއްލައިދޫއަށެވެ. މިދެމީހުން މަރުވިގޮތާ ބެހޭ ފުރިހަމަ މައުލޫމާތުތަކެއް ލިބިފައެއް ނުވެއެވެ.

މި ދެމީހުން ވަޅުލުމުގެ ކަންތައް މި މަހު 29 ވަނަ ދުވަހު ބްރިމިންގްޓަން ކްރެމަޓޯރީއަމްގައި ކުރިއަށް ގެންދިޔުމަށް ވަނީ ހަމަޖެހިފައެވެ.