މުދާ ހުސްކުރާ ކުންފުނިތަކުގެ ކަންބޮޑުވުންތަކަށް ހައްލު ހޯދަދޭނަން: ރައީސް

މުދާ ހުސްކުރުމަށް މަސައްކަތްކުރާ ކުންފުނިތަކުގެ ކަންބޮޑުވުންތަކަށް ރަނގަޅު ހައްލެއް ހޯދައިދޭން މަސައްކަތް ކުރައްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ މާލެ ވިޔަފާރި ބަނދަރުގައި މުދާ ހުސްކުރުމަށް މަސައްކަތްކުރާ ކުންފުނިތަކުގެ ވެރިންނާއި ބައްދަލުކުރެއްވުމުގައި އެ ކުންފުނިތަކުގެ ވެރިން ފާހަގަ ކުރި މައްސަލަތަކަށް ރިއާޔަތްކޮށް ކަމަށް ރައީސް އޮފީހުން ބުންޏެވެ.

އެގޮތުން، މި ބައްދަލުވުމުގައި އެ ކުންފުނިތަކުގެ ވެރިންނަށް މާލެ ވިޔަފާރި ބަނދަރުން މުދާ ހުސްކޮށް ބޭރުކުރުމުގައި ދިމާވާ ހުރިހާ ދަތިތައް ހުށަހެޅުމަށް ފުރުސަތުދީފައިވާނެ ކަމަށް ރައީސް އޮފީހުން ބުންޏެވެ.

މީގެ އިތުރުން، ރައީސް އޮފީހުން ބުނީ މުދާ އުފުލާ ގަޑިއާއި، ވަސީލަތްތަކާއި އިދާރީ ނިޒާމް ހަރުދަނާކުރުމާއި ގުޅޭގޮތުން ރައީސް އާ އެ ކުންފުނި ތަކުގެ ވެރިން ކަންބޮޑުވުން ހިއްސާކޮށްފައިވާނެ ކަމަށެވެ.

އަދި މިކަމާ ގުޅިގެން ރައީސް ދެއްކެވި ވާހަކަފުޅުގައި އެ ބޭފުޅުންގެ ކަންބޮޑުވުންތަކަށް ރަނގަޅު ހައްލެއް ހޯދަދޭން މަސައްކަތް ކުރާނެ ކަމަށް ރައީސް ވިދާޅުވެފައިވާކަމަށް ރައީސް އޮފީހުން މައުލޫމާތު ދިނެވެ.