ރައީސް މުޢިއްޒުގެ މޭޔަރުކަމުގެ ދައުރަކީ މާލޭގެ މުނިސިޕަލް ޚިދުމަތުގެ ރަންޒަމާން: ޖަލީލް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ ސިޓީގެ މޭޔަރުކަމުގައި ހުންނެވި ދައުރަކީ މާލޭގެ މުނިސިޕަލް ޚިދުމަތުގެ "ރަންޒަމާން" ކަމަށް، މާލެ ސިޓީގެ މޭޔަރުކަމަށް ޕީއެންސީގެ ފަރާތުން ވާދަކުރައްވާ ކެންޑިޑޭޓް، ކުރީގެ ޑިފެންސް މިނިސްޓަރު މޭޖާ ޖެނެރަލް ރިޓަޔަޑް މޫސާ އަލީ ޖަލީލު މިރޭ ވިދާޅުވެއްޖެއެވެ.

ކެންޑިޑޭޓް މޫސާ ޖަލީލުގެ ކެމްޕޭން ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅުދައްކަވަމުން އޭނާ ވިދާޅުވީ، ރައީސް މުޢިއްޒުގެ މޭޔަރުކަމުގައި މާލޭގެ ހިންގުމަށް އިންގިލާބީ ބަދަލުތަކެއް ގެންނެވި ކަމަށެވެ.

އަދި ރައީސްގެ މޭޔަރުކަމުގައި ގުރުއާން މުބާރާތްތަކާއި ކުޅިވަރު ފެސްޓިވަލްތައް ބާއްވަވައި އެކުވެރިކަމާއި އިޖުތިމާއީ ރޫހު އާލާކުރައްވައި، އީދުގެ ދިއްލުންތަކުން މާލޭ ސިޓީއަށް ހިނިތުންވުން ގެނެސްދެއްވައި އެހެން ސިޓީތަކާއި ރަށްރަށަށް ނަމޫނާ ދެއްކެވި ކަމަށްވެސް ޖަލީލް ވިދާޅުވިއެވެ.

ޖަލީލު ފާހަގަކުރެއްވި ގޮތުގައި 2011 ވަނަ އަހަރުން ފެށިގެން ދިހަ ވަރަކަށް އަހަރު ވަންދެން މާލޭގެ ރައްޔިތުންނަށް ކައުންސިލުން އެކަށީގެންވާ ޚިދުމަތްތަކެއް ނުލިބި އޮތް އޮތުން ބަދަލުކުރެއްވީ ރައީސް މުޢިއްޒުގެ މޭޔަރުކަމުގައެވެ. އަދި އެއީ މާލޭގެ ރައްޔިތުން އެންމެ ގިނަ ވޯޓު ދީގެން އިންތިޚާބުކުރި މޭޔަރުކަންވެސް އޭނާ ފާހަގަކުރެއްވިއެވެ.

މީގެ އިތުރުން ޖަލީލު ވިދާޅުވީ، ޕީއެންސީގެ މެންބަރުންގެ އިތުބާރު ދަމަހައްޓައި، މާލޭގެ ރައްޔިތުންގެ ހައްގުގައި ފަޚްރުވެރި މަސައްކަތްތަކެއް ކޮށްދިނުމަކީ އޭނާގެ އެންމެ ބޮޑު ޢަޒުމް ކަމަށެވެ.

އަދި އޭނާ ވާނީ ވަކި ކުލައަކަށް ތަފާތުކުރުމެއްނެތި މަސައްކަތް ކުރާނެ ޚާދިމަކަށް ކަމަށާއި، މާލޭގެ ރައްޔިތުންގެ ހިތްތައް ފަތަހަކުރާނީ ލޯތްބާއި އޯގާތެރިކަމާއެކު، ސަރުކާރާ ގުޅިގެން ރައްޔިތުން އެންމެ ބޭނުންވާ ޚިދުމަތްތައް ފުއްދައިދީގެން ކަމަށްވެސް އޭނާ ވިދާޅުވިއެވެ.