ގޯތީގެ ޞައްޙަނޫން ލިޔުންތަކެއް އުފެއްދި މައްސަލައިގައި ފަަަޒީލުއާއެކު އިތުރު ބަޔަކަށް ދަޢުވާ އުފުލައިފި

"ބިންވެރިޔާ" ސްކީމުގެ ދަށުން ހުޅުމާލެއިން ގޯތި ލިބިފައިވާކަމަށް ދެއްކުމުގެ ގޮތުން ޞައްޙަނޫން ލިޔުންތަކެއް އުފައްދައި، އެ ލިޔުންތައް ހައުސިންގ ޑިވަލޮޕްމަންޓް ކޯޕަރޭޝަން (އެޗްޑީސީ) އަށް ހުށަހެޅި މައްސަލާގައި ބަޔަކަށް ދަޢުވާކުރުމަށް ކްރިމިނަލް ކޯޓަށް މިއަދު ހުށަހަޅައިފިއެވެ.

މި މައްސަލައިގައި ޞައްޙަނޫން ލިޔުމެއް އުފެއްދުމުގެ ކުށުގެ ދަޢުވާ އުފުލާފައިވަނީ ގ. ޕޫލްބަހާރުއާގެ، އަޙްމަދު ޢަތީޤް ޢަބްދުالله އާއި ނ. ވެލިދޫ، ޑޭޒީމާގެ އަޙްމަދު މާޒިން ގެ މައްޗަށެވެ.

މީގެ އިތުރުން މ. ފަޅުމަތީގެ، އަރުޝަދު ޢަލީ ގެ މައްޗަށް ވަނީ ޞައްޙަނޫން ލިޔުމެއް އުފެއްދުމުގައި ބައިވެރިވުމުގެ ކުށުގެ ދަޢުވާ އުފުލާފައެވެ. ޕީޖީ އޮފީހުން ބުނި ގޮތުގައި، މި ފަރާތްތަކުން ވަނީ ބިންވެރިޔާ ސްކީމްގެ ދަށުން ހުޅުމާލެ އަދި ގުޅީފަޅުން ބިން ދޫކުރުމަށް ފޯމު ހުށަހެޅުމަށް ހުޅުވާލި ދުވަސްވަރު، އެ މަސައްކަތުގައި އުޅެމުން ބިމުގެ ހައްޤުވެރިކަން އެނގޭނޭ ސައްހަނޫން ރަޖިސްޓްރީއާއި އެއްބަސްވުންތައް އުފައްދާފައެވެ.

މީގެ އިތުރުން އެނގިހުރެ ޞައްޙަނޫން ލިޔުމެއް ދިނުމުގެ ކުށުގެ ދަޢުވާ 9 މީހެއްގެ މައްޗަށް ވަނީ އުފުލާފައެވެ. އެއީ މަރްޔަމް ސާޢީ، މުޙައްމަދު ފަޟީލް ރަޝީދު، އީމާ ވަހީދު، ޢާއިޝަތު މަޢުރޫފާ، މުޙައްމަދު އާދަމް، ޢަބްދުލްމަޖީދު މާހިރު، ޙުސައިން ޒާހިރު ޒައިނު، އަޝްހަދު ޢަލީ އަދި އަޙްމަދު ޢަލީއެވެ.

އެމީހުން ވަނީ ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބިފައިވާކަން ދެއްކުމަށާއި، ގޯތީގެ ވަށާފާރު ރޭނުމުގެ ހުއްދަ ހޯދުމަށްޓަކައި ޞައްޙަނޫން ރަޖިސްޓްރީއާއި އެއްބަސްވުންތައް އެޗްޑީސީއަށް ހުށަހަޅާފައެވެ.

ޕީޖީ އޮފީހުން އިތުރަށް ބުނީ، މި މައްސަލާގައި ކޮރަޕްޝަންގެ ޢަމަލުތަކެއް ހިމެނޭތީ، އެ ބައިތައް ވަކި މައްސަލައެއްގެ ގޮތުގައި އެންޓި-ކޮރަޕްޝަން ކޮމިޝަން (އޭސީސީ) އިން ތަޙުޤީޤުކުރަމުންދާ ކަމަށެވެ.

އޭސީސީގެ ތަޙުޤީޤު ނިމުމުން، އެ ބައިތަކުގައި ދަޢުވާކުރުމާމެދު ގޮތެއް ނިންމާނެ ކަމަށްވެސް އެ އޮފީހުން މަޢުލޫމާތު ދެއެވެ.