ވަން އެވެނިއުގެ އަލިފާން: ފަސް މީހަކަށް ބޯހިޔާވަހިކަން ފޯރުކޮށްދީފި

ހުޅުމާލޭގެ ފުރަތަމަ ފިޔަވަހީގައި ހުންނަ ވަން އެވެނިއުގައި ރޭ ހިނގި އަލިފާނުގެ ހާދިސާއާ ގުޅިގެން ފަސް މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.

އެ އޮތޯރިޓީން ބުނީ ރޭ 11:00 ހާއިރު، ވަން އެވެނިއުގެ ހަތްވަނަ ފަންގިފިލާގެ އެޕާޓްމަންޓެއްގައި އަލިފާނުގެ ހާދިސާއެއް ހިނގާފައިވާކަމަށެވެ. އަދި މި އަލިފާނުގެ ހާދިސާގައި އެތަނުގެ ބަނދިގެއަށް ބޮޑެތި ގެއްލުންތަކެއް ވެފައިވާކަމަށްވެސް ވަނީ ބުނެފައެވެ.

މި ހާދިސާއާއި ގުޅިގެން ފަސް މީހަކަށް އެންޑީއެމްއޭއިން މިހާރު ވަނީ ވަގުތީ ބޯހިޔާވަހިކަން ފޯރުކޮށްދީފައެވެ. މީގެ ތެރޭގައި އުމުރުން ދުވަސްވީ މީހަކާއި ނޭވާ ހިއްލާ ކުޑަކުއްޖަކު ހިމެނެއެވެ.

މި ހާދިސާގައި އެއްވެސް މީހަކަށް ގެއްލުން ލިބުނުކަމުގެ މައުލޫމާތެއް ލިބިފައެއް ނުވެއެވެ.

މިއީ ހުޅުމާލެ ފޭސް ވަންގައި މި މަހު ހިނގި ދެވަނަ އަލިފާނުގެ ހާދިސާއެވެ. މި މަހުގެ ފުރަޔަމަ ދުވަހުވެސް ފުރަތަމަ ފިޔަވަހީގެ ގެއެއްގެ ތިރީގައި ހުރި ގުދަނެއްގައި ރޯވެ 25 މީހަކަށް އެންޑީއެމްއޭއިން ވަގުތީ ބޯހިޔާވަހިކަން ފޯރުކޮށްދީފައިވެއެވެ.