ރޭ މާލޭގައި ހިނގި އަލިފާނުގެ ހާދިސާގައި 7 މީހަކަށް ބޯހިޔާވަހިކަންދީފި

މާލޭގެ ގެއެއްގައި ރޭ ދަންވަރު ހިނގި އަލިފާނުގެ ހާދިސާއަކާ ގުޅިގެން، ހާލުގައި ޖެހުނު ހަތް މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.

އެމްއެންޑީއެފުން މައުލޫމާތު ދިން ގޮތުގައި، މީހުން ދިރިއުޅޭ މއ. ރިމްލާސް ގޭގައި އަލިފާން ރޯވެގެން ރިޕޯޓް ލިބިފައިވަނީ ރޭ ދަންވަރު 03:06 ހާއިރުއެވެ. ރިޕޯޓް ލިބުމާއެކު މާލޭ ފަޔާ ސްޓޭޝަނުގެ ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ވަނީ ވަގުތުން ފަށާފައެވެ.

ސިފައިން ކުރި ބުރަ މަސައްކަތުން އެ ގޭގައި ރޯވި އަލިފާން އެއްކޮށް ނިއްވާލެވިފައިވަނީ ފަތިހު 04:12 ހާއިރުއެވެ. މި ހާދިސާގައި އެ ގޭގެ އެކި ބައިތަކަށް ބޮޑެތި ގެއްލުންތަކެއް ލިބިފައިވީ ނަމަވެސް، އެއްވެސް މީހަކަށް ޖިސްމާނީ އަނިޔާއެއް ވިކަމުގެ ރިޕޯޓެއް ލިބިފައި ނުވާ ކަމަށް އެމްއެންޑީއެފުން ބުނެފައިވެއެވެ.

އެންޑީއެމްއޭ އިން ހާމަކުރި ގޮތުގައި، މއ. ރިމްލާސް ގޭގައި ހިނގި މި ހާދިސާގައި އެ ގެއަށް ލިބުނު ބޮޑެތި ގެއްލުންތަކުގެ ސަބަބުން އެތަނުގައި މިވަގުތު ދިރިއުޅެން ދަތިވެއެވެ. އެހެންކަމުން، އެގޭގައި ދިރިއުޅޭ ހަތް މީހަކަށް ފަސް ދުވަހުގެ މުއްދަތަށް ބޯހިޔާވަހިކަމާއި ކާތަކެތި ފޯރުކޮށްދިނުމުގެ އިންތިޒާމު އެ އޮތޯރިޓީން ވަނީ ހަމަޖައްސާފައެވެ.