އިއްޔެ އަލިފާން ރޯވި މަސްދޯނީގެ ތަކެތި އޮޔާ ދާތީ ސަމާލުވުމަށް އެދިއްޖެ

އިއްޔެ އަލިފާން ރޯވި މަސްދޯނި އަޑިއަށްދިޔުމުން، ދޯނީގެ ތަކެތި އޮޔާ ދާތީ ސަމާލުވުމަށް ސިފައިން މިއަދު އެދިއްޖެއެވެ.

ތަކެތި އޮޔާދާ ކަމަށް ލަފާކުރެވެނީ ހާދިސާގައި ދޯނި އަޑިއަށްދިޔަ ސަރަޙައްދުން ފެށިގެން ދެކުނަށް ކަމަށް ސިފައިން ބުންޏެވެ.

"ފްރެޝް ފްރޮމް ދަ ސީ" ނަމަކަށް ކިޔާ ކަންކެލި މަސްވެރިކަން ކުރާ ދޯންޏެއްގައި އަލިފާން ހިފާފައިވަނީ ކ.ދޫނިދޫ ކައިރީގައި އޮއްވައެެވެ.

އަލިފާން ރޯވިކަމުގެ ރިޕޯޓް އިއްޔެ 14:57 ހާއިރު އެމްއެންޑީއެފް ފަޔާ އެންޑް ރެސްކިޔު ސާވިސްއަށް ލިބުމާ އެކު، އެމްއެންޑީއެފް ފަޔާ އެންޑް ރެސްކިޔު ސާވިސްގެ އެކޯ-9 އަލިފާންގަނޑު ވަނީ ނިއްވާލާފައެވެ. މީގެ އިތުުރުން ހުޅުމާލޭ ފަޔާ ސްޓޭޝަންގެ ފަޔާ ފައިޓަރުން ވަނީ ލޯންޗުގައި އެ ސަރަހައްދަށް ގޮސް އެހީތެރިކަން ފޯރުކޮށްދީފައެވެ.

ދޯނީގައި ރޯވި އަލިފާން ނިއްވާލުމުގެ މަސައްކަތް ކުރަމުންދަނިކޮށް އިއްޔެ 16:46 ހާއިރު ދޯނި ވަނީ އަޑިއަށްގޮސްފައެވެ.

އެމްއެންޑީއެފް ވަނީ ދަތުރުކުރާ މީހުން މި ކަމަށް ސަމާލުކަން ދެއްވުމަށް އިލްތިމާސްކޮށްފައެވެ. އަދި ޚާއްސަކޮށް މި ސަރަހައްދުން ރޭގަނޑު ދަތުރުކުރައްވާ ނަމަ މިކަމަށް ސަމާލުވުމަށް ވެސް ވަނީ އަންގާފައެވެ.