ދަތިކަމެއް ނެތި ތެލާއި ކާބޯތަކެތި ލިބޭނެ ކަމުގެ ޔަގީންކަން ރައީސް ދެއްވައިފި
އަޙްމަދު ސަދޫފް މޫސާ
SHARE
ދުއިރުމަތީގެ މަސްރަހަށް އަންނަމުންދާ ބަދަލުތަކާއެކު ވެސް، ރާއްޖެއަށް ބޭނުންވާ ތެލާއި ކާބޯތަކެތި އެއްވެސް ދަތިކަމެއް ނެތި ލިބޭނެ އިންތިޒާމުތައް ހަމަޖެހިފައިވާ ކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، އެމެރިކާ އަދި އިޒްރޭލުން އީރާނަށް ދިން ހަމަލާއާއެކު ރާއްޖެއަށް އޮތް އެންމެ ބޮޑު ކަންބޮޑުވުމަކީ ފަތުރުވެރިކަމާއި، ތެލާއި ކާބޯތަކެތީގެ ސަލާމަތްތެރިކަން ކަމަށެވެ. ނަމަވެސް، މި ހުރިހާ ދާއިރާއަކުން ވެސް ރާއްޖެއަށް ބޭނުންވާ ތަކެތި މެދުނުކެނޑި ލިބޭނެ އިންތިޒާމުތައް މިހާރު ހަމަޖެހިފައިވާ ކަމަށް އެމަނިކުފާނު ވިދާޅުވިއެވެ.
ތެލަށް އެއްވެސް ކަހަލަ ކަންބޮޑުވުމެއް އަދި އަޅުގަނޑުމެންނަކަށް ދިމައެއް ނުވޭ. އަޅުގަނޑުމެންނަށް އިރާދަކުރެއްވިޔާ ހަމަ ވަރަށް ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް، ތެޔޮ، ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް އަދި ނެތް އެއްވެސް ކަހަލަ ކަންބޮޑުވާން ޖެހޭ އެއްވެސް ކަމެއް، - ރައީސް ޑރ. މުޙައްމަދު މުޢިއްޒު
މި ވަގުތު ވެސް ރާއްޖޭގައި މަހަކަށްވާ ވަރަށް ތެޔޮ އެބަހުރި ކަމަށާއި، ރާއްޖޭގައި ތެޔޮ ރައްކާކުރެވޭނެ އެންމެ މަތީ މިންވަރަށް މިހާރު ވެސް ސްޓޮކް ހުރިކަން ރައީސް ފާހަގަކުރެއްވިއެވެ. މީގެ އިތުރުން، ތެލުގެ އައު ޝިޕްމެންޓެއް ހިފައިގެން އޮމާންގެ ބޯޓެއް ރާއްޖެއަށް ދަތުރުފަށައިފައިވާކަމަށް ވެސް ރައީސް ވިދާޅުވިއެވެ.
މެދުއިރުމަތީގެ ހަމަނުޖެހުންތަކުގެ ސަބަބުން ފަތުރުވެރިކަމަށް އަސަރުކުރާނެކަން ފާހަގަކުރައްވަމުން ރައީސް ވިދާޅުވީ، އެކަން ހައްލުކުރުމަށް އެހެން ރޫޓްތައް ބަލައި، އެ އިންތިޒާމުތައް ހަމަޖެއްސުމަށް އެއާލައިންތަކާއި އެމްބަސީތަކާއެކު މަޝްވަރާ ކުރަމުންދާ ކަމަށެވެ.
އެހެންކަމުން ރާއްޖޭގައި ތިބި ފަތުރުވެރިންނާއި އަދި ރާއްޖެއަށް އަންނާނެ ފަތުރުވެރިންނަށް ވެސް އޭގެން ގޮތްތަކެއް ހޯދޭނެ ކަމަށް އެމަނިކުފާނު ވިދާޅުވިއެވެ.
