ހަނގުރާމަކުރިޔަސް، ތެލަށް ނުޖެހޭނެކަމުގެ ޔަގީންކަން އެބައޮތް: ސައީދު

މެދުއިރުމަތީގައި ހަނގުރާމައެއް ފެށުނު ނަމަވެސް، ރާއްޖެ ތެލަށް ނުޖެހޭނެ ކަމުގެ ފުރިހަމަ ޔަގީންކަން އެބައޮތް ކަމަށް އިކޮނަމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ އެމެރިކާއާއި އިސްރާއީލުން އީރާނަށް ދެމުންދާ ހަމަލާތަކާ ގުޅިގެން ރާއްޖެއަށް ކުރިމަތިވެދާނެ އަސަރުތަކާ ބެހޭގޮތުން ނޫސްވެރިން ކުރި ސުވާލުތަކަށް ޖަވާބު ދެއްވަމުންނެވެ.

މިއަދު އިކޮނަމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ސަޢީދު ވިދާޅުވީ، މެދުއިރުމަތީގެ ހަމަނުޖެހުންތަކާ ގުޅިގެން އިއްޔެ ބައިނަލްއަގުވާމީ މާކެޓްގައި ތެލުގެ އަގަށް ބޮޑު ބަދަލެއް އައިސްފައިވާ ކަމަށެވެ.

އެގޮތުން ތެލުގެ އަގު ގާތްގަނޑަކަށް 25 އިންސައްތައާއި 30 އިންސައްތައާ ދެމެދުގެ މިންވަރަކަށް އުފުލިފައިވާ ކަމަށާއި، ތެލުގެ އިތުރުން ގޭހުގެ އަގަށްވެސް މިކަމުގެ އަސަރު ކޮށްފައިވާކަން މިނިސްޓަރު ފާހަގަކުރެއްވިއެވެ.

"ތެލަކަށް ނުޖެހޭނެ އިރާދަކުރެއްވިއްޔާ. އެލްޕީޖީ ވެސް އަދި ތެޔޮ ވެސް ހިމަނައިގެން މި ދެންނެވީ،" މިނިސްޓަރު ވިދާޅުވިއެވެ.

މިނިސްޓަރު ސަޢީދު ވިދާޅުވި ގޮތުގައި ރާއްޖޭގެ ތެލުގެ ކަންކަން ބަލަހައްޓަމުންދަނީ ދުނިޔޭގެ މަސްރަޙަށް އަންނަ މިފަދަ ބަދަލުތަކަށް ރިޢާޔަތްކޮށްގެންނެވެ. އެންމެ ދަތިވާނެ ހާލަތްތަކުގައިވެސް ތެޔޮ ލިބޭނެ އިތުރު ގޮތްތައް ސަރުކާރުން ހަމަޖައްސަމުންދާ ކަމުގެ ޔަގީންކަން އޭނާ ދެއްވިއެވެ.

މީގެ އިތުރުން، ރާއްޖޭގައި ތެޔޮ ރައްކާކުރާނެ ކެޕޭސިޓީ އިތުރުކުރުމަށް ސަރުކާރުން ޚާއްޞަ މަސައްކަތްތަކެއް ކުރަމުންދާ ކަމަށްވެސް މިނިސްޓަރު ވިދާޅުވިއެވެ. ރާއްޖެއަށް އަހަރަކު ދެ މިލިއަނަށްވުރެ ގިނަ ފަތުރުވެރިން ޒިޔާރަތްކުރާއިރު، އެ އެންމެންނަށްވެސް ބޭނުންވާ މިންވަރަށް ތެލާއި ކާބޯތަކެތީގެ ރައްކާތެރިކަން ކަށަވަރުކުރުމަކީ ސަރުކާރުގެ އިސް އަމާޒެއްކަން އޭނާ ފާހަގަކުރެއްވިއެވެ.

މެދުއިރުމަތީގެ މަސްރަޙު ގޯސްވެފައިވަނީ މިދިޔަ ހޮނިހިރު ދުވަހުން ފެށިގެން އެމެރިކާއާއި އިސްރާއީލުން އީރާނަށް ހަމަލާދޭން ފެށުމާ ގުޅިގެންނެވެ. މީގެ ރައްދުގައި އީރާނުން އަންނަނީ މެދުއިރުމަތީގައި ހުރި އެމެރިކާގެ މިލިޓަރީ ބޭސްތަކަށާއި އެމްބަސީތަކުގެ އިތުރުން ބައެއް އެއާޕޯޓްތަކަށް އަމާޒުކޮށް ހަމަލާތައް ދެމުންނެވެ.