ގްރޭޓާ މާލެ ފައިނޭންޝަލް ޑިސްޓްރިކްޓް ލިމިޓެޑްގެ ނަން ބަދަލުކޮށްފި

ސަރުކާރުގެ ސައްތައިންސައްތަ ހިއްސާވާ ކުންފުންޏެއް ކަމަށްވާ ގްރޭޓާ މާލެ ފައިނޭންޝަލް ޑިސްޓްރިކްޓް ލިމިޓެޑްގެ ނަން، "މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް ލިމިޓެޑް" އަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބަދަލުކުރައްވައިފި އެވެ.

ރައީސުލްޖުމްހޫރިއްޔާ މި ބަދަލު ގެންނެވިކަން އިއުލާން ކުރައްވާފައިވަނީ މިއަދު ޝާއިއުކުރެއްވި ރިޔާސީ ގަރާރެއްގެ މެދުވެރިކޮށެވެ.

ގްރޭޓާ މާލެ ފައިނޭންޝަލް ޑިސްޓްރިކްޓް ލިމިޓެޑަކީ ރާއްޖެ ބައިނަލްއަގުވާމީ މާލީ މަރުކަޒަކަށް ހަދައި، އިގްތިސާދު ކުރިއެރުވުމަށް 2025 ވަނަ އަހަރު އުފެއްދި ކުންފުންޏެކެވެ. މި ކުންފުނީގެ މައިގަނޑު މަގުސަދަކީ ޑިޖިޓަލް ފައިނޭންސާއި، ރިއަލް އެސްޓޭޓާއި، ފައިނޭންޝަލް ޓޫރިޒަމް އަދި ބޭންކިން ފަދަ މާލީ ހިދުމަތްތައް ރާއްޖޭގައި ތަރައްގީކޮށް ތަންފީޒު ކުރުމެވެ.

ރައީސުލްޖުމްހޫރިއްޔާގެ ގަރާރުގައި ބަޔާންކޮށްފައިވާ ގޮތުގައި، ކުންފުނީގެ ނަން ބަދަލުކުރަން ނިންމެވީ ކުންފުނީގެ ނަމާއި މަގުސަދުތަކަށް ބަދަލު ގެނައުމަށް އެ ކުންފުނީގެ ބޯޑުން ނިންމެވުމާ ގުޅިގެންނެވެ. މީގެ ތެރޭގައި ރާއްޖޭގެ އުފެއްދުންތެރިކަން އިތުރުކުރުމާއި، ޑިޖިޓަލް ފައިނޭންޝަލް ހިދުމަތްތަކާއި ބޭންކިންގެ ދާއިރާއިން ރާއްޖެއަކީ ބައިނަލްއަގުވާމީ މަރުކަޒަކަށް ހެދުން ހިމެނެއެވެ.

މީގެ އިތުރުން، ރާއްޖޭގެ އިސްތިރާޖީ މަންފާ އެންމެ އެދެވޭ ގޮތެއްގައި ހާސިލުކުރުމާއި، ހާއްސަކޮށް ތިލަދުންމަތީ އުތުރުބުރީ އިހަވަންދިއްޕޮޅު ތަރައްގީ ކުރުމުގެ މަޝްރޫއު ވިލަރެސްކޮށް ތަންފީޒު ކުރުމަކީ މި ކުންފުނީގެ މުހިންމު މަގުސަދެކެވެ. މި މަސައްކަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ކުންފުނީގެ ތަސައްވުރާ އެއްގޮތަށް ނަން ބަދަލުކުރުމަކީ އިސްތިރާޖީ ގޮތުން މުހިންމު ކަމެއް ކަމަށް ރައީސް ފާހަގަކުރައްވާފައިވެއެވެ.

މި ބަދަލާއެކު، މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް ލިމިޓެޑް ހަރަކާތްތެރިވާނީ ރާއްޖޭގެ އިގްތިސާދީ ކުރިއެރުމަށް ބޭނުންވާ ބޮޑެތި މަޝްރޫއުތައް ހިންގާ އަދި މާލީ ހިދުމަތްތަކުގެ ސިނާއަތް ފުޅާކުރުމަށް ސީދާ އަމާޒުކޮށްފައިވާ ހާއްސަ ކުންފުންޏެއްގެ ގޮތުގައެވެ.