ޗާގޮސްގެ މައްސަލައިގައި މޮރިޝަސް އިން ރާއްޖެއާ ގުޅުން ކެނޑުން ވަރަށް "އިމެޗުއާ": ރައީސް

ޗާގޮސްގެ މައްސަލައިގައި މޮރިޝަސް އިން ދިވެހިރާއްޖެއާއެކު އޮތް ގުޅުން ކަނޑާލުމަށް ނިންމި ނިންމުމަކީ ވަރަށް "އިމެޗުއާ" އަދި ތާކުންތާކު ނުޖެހޭ ނިންމުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދުގެ ނޫސްވެރިންގެ ބައްދަލުވުމުގައި މި މައްސަލައާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ހައްގު ނޫން ތަނެއް ހައްގު ނުވާނެ ކަމަށާއި، އެއްވެސް ގައުމަކާ ޗާގޯސް ހަވާލުކުރާ ނަމަ، އެތަން ހަވާލުކުރަން ޖެހޭނީ އޭގެ ހައްގުވެރި ފަރާތާ ކަމަށެވެ. އަދި އެއީ ދިވެހިރާއްޖެ ކަމަށް ރައީސް ވަނީ ތަކުރާރުކުރައްވާފައެވެ.

މޮރިޝަސްގެ ނިންމުމަށް ފާޑުވިދާޅުވަމުން ރައީސް ވިދާޅުވީ، އެއްވެސް މަޝްވަރާ ކުރުމެއް ނެތި އަމިއްލަފުޅަށް މިފަދަ ނިންމުމެއް ނިންމުމަކީ ވަރަށް "ނައިވް" އަދި "އިމެޗުއާ" ކަމެއް ކަމަށެވެ. އަދި މިކަމުގެ ސަބަބުން ރާއްޖޭގެ ސްޓޭންޑަށް އެއްވެސް ބަދަލެއް ނާންނާނެ ކަމަށާއި، ރާއްޖެ ކުރިއަށް ދާނީ "މޯލްޑިވްސް ފަސްޓް" ސިޔާސަތުގެ ދަށުން ކަމަށް އެމަނިކުފާނު ވިދާޅުވިއެވެ.

މޮރިޝަސް އިން ރާއްޖެއާ ގުޅުން ކަނޑާލަން ނިންމާފައިވަނީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން، ކުރީގެ ރައީސް އިބްރާހިމް މުހައްމަދު ސޯލިހް މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު އަނބުރާ ގެންނެވުމަށް ނިންމެވިކަން ރައީސް މުޢިއްޒު އިއުލާން ކުރެއްވުމާ ގުޅިގެންނެވެ.

ރައީސް މުޢިއްޒު އިތުރަށް ވިދާޅުވީ، ދިވެހި ދައުލަތުގެ އެންމެ މަތީ މަސްލަހަތު ހިމާޔަތްކުރުމުގައި މި ސަރުކާރުން ފަސްނުޖެހޭނެ ކަމަށާއި، ރާއްޖޭގެ ކަނޑުގެ ސަރަހައްދުން ގެއްލުނު ބައި ހޯދުމަށް ކުރަންޖެހޭ މަސައްކަތްތައް ކުރިއަށްދާނެ ކަމަށެވެ.