ހުޅުމާލެއިން ހިލޭ ގޯތި ދޫކޮށްގެން ލިބުނު ގެއްލުން ހޯދަން އޮޑިޓު ކުރަނީ

ބިންވެރިޔާ ސްކީމުގެ ދަށުން ހުޅުމާލެއިން ހިލޭ ދޫކުރި ގޯތިތަކުގެ ސަބަބުން އެޗްޑީސީއަށް ލިބުނު ގެއްލުން ހޯދުމަށް ޚާއްސަ އޮޑިޓެއް ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފިއެވެ.

މާލިއްޔަތު ކޮމިޓީގެ މިއަދުގެ ބައްދަލުވުމުގައި މި އޮޑިޓް ހެދުމަށް ހުށަހެޅީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ. އެ ހުށަހެޅުމަށް ތާއީދު ކުރެއްވީ ފުނަދޫ ދާއިރާގެ މެންބަރު މުހައްމަދު މަމްދޫހުއެވެ.

އެކަން ހުށަހަޅުއްވަމުން ހަމަދު ވިދާޅުވި ގޮތުގައި މި އޮޑިޓްގެ މަޤްޞަދަކީ ގޯތިތައް އަނބުރާ ނެގުމެއް ނޫނެވެ.

"ސަރުކާރުތަކުން ސިޔާސީ ބޭނުމަށް މި ފަދަ ކަންކަން ކުރާ އިރު ކުންފުނިތަކަށް މާލީ ގެއްލުމާ އެއްޗެހި ލިބިފައިވަނީ ކިހާވަރަކަށް ކަން ބަލަން ޖެހޭ," ހަމަދު ވިދާޅުވިއެވެ.

އެއާއެކު، އެސްޑީއެފްސީ އުފެދުނީއްސުރެ، ސަރުކާރު ބަދަލުވަންދެން އެ ކުންފުނިން ލޯނު ދޫކޮށްފައި ހުރި ގޮތް ބެލުމަށް އޮޑިޓެއް ކުރުމަށް ވެސް ވަނީ އޭނާ ހުށަހަޅުުއްވާފައެވެ.

މި ދެ ހުށަހެޅުން ވެސް ވަނީ ކޮމިޓީގައި ބައިވެރިވި މެންބަރުންގެ އިއްތިފާގުން ފާސްކޮށްފައެވެ. އަދި، ދެ މަސް ދުވަހުގެ ތެރޭގައި އެ އޮޑިޓްތައް ނިންމުމަށް އޮޑިޓް އޮފީހަށް އެންގުމަށް ވެސް ނިންމާފައިވެއެވެ.

އޮޑިޓް އޮފީހުން މީގެ ކުރިން ހާމަކޮށްފައިވާ ގޮތުގައި، ހުޅުމާލެއިން ހިލޭ ދޫކުރި 1،380 ގޯތީގެ ސަބަބުން އެޗްޑީސީއަށް 10.5 ބިލިއަން ރުފިޔާގެ ގެއްލުން ވަނީ ވެފައެވެ.