ހިރިމަރަދޫ ރައްޔިތުން ތުލުސްދޫއަށް ބަދަލުކޮށްދިނުމަށް އެދިއްޖެ

ހދ.ހިރިމަރަދޫ ފަޅުކޮށް، އެރަށުގެ ރައްޔިތުން އެހެން ރަށަކަށް ބަދަލުކޮށްދިނުމަށް އެ ރަށު ކައުންސިލުން އެދިއްޖެއެވެ.

ހިރިމަރަދޫ ކައުންސިިލާއެކު އިއްޔެ ބައްދަލުކުރެއްވުމަށް ފަހު ލޯކަލް ގަވަނެންސް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވީ ހިރިމަރަދޫ ގެ ރައްޔިތުން އެހެން ރަށަކަށް ބަދަލުވުމަށް ނިންމާފައިވާކަކަމަށް އެރަށުގެ ކައުންސިލް މެމްބަރުން އިއްޔެ ބޭއްވި ބައްދަލުވުމުގައި ވިދާޅުވި ކަމަށެވެ.

އެރަށުގެ ރައްޔިތުން ބަދަލުވާން ބޭނުންވާ ރަށެއްގެ ގޮތުގައި ތުލުސްދޫ ފާހަގަކުރި ކަމަށް ވެސް މިނިސްޓަރު ވިދާޅުވިއެވެ.

2014 ވަނަ އަހަރުގެ ބޯހިމެނުމުގެ ހިސާބުތައް ދައްކާގޮތުން ހިރިމަރަދޫގެ އާބާދީއަކީ 335 މީހުންނެވެ. ނަމަވެސް ފަހުގެ މައުލޫމާތަށް ބަލާއިރު ރަޖިސްޓްރީކޮށްފައިވާ އާބާދީއަކީ 589 މީހުންނެވެ. އޭގެ ތެރެއިން ގިނަ މީހުން ދިރިއުޅެމުންދަނީ އެހެން ރަށްރަށުގައެވެ.