ސްނޯކްލިންއަށް ދިޔަ ރިސޯޓެއްގެ މުވައްޒަފަކު ގެއްލިގެން ހޯދަނީ

ސްނޯކްލިންއަށް ގޮސް އުޅެނިކޮށް ރ. އަތޮޅު ރިސޯޓެއްގެ މުވައްޒަފަކު ގެއްލިގެން ހޯދަން ފަށައިފިއެވެ.

ފުލުހުންގެ މީޑިއާ އޮފިޝަލް ވިދާޅުވީ އިއްޔެ 3:35 ހާއިރު ސްނޯކްލިންއަށް ގޮސް އުޅެނިކޮށް އެ މީހާ ގެއްލިފައިވާކަން ފުލުހުންނަށް ރިޕޯޓްކޮށްފައިވާ ކަމަށެވެ.

އެއީ އިންޑިއާއަށް ނިސްބަތްވާ އުމުރުން 25 އަހަރުގެ އަފްތާބު ޚާން އެވެ. އޭނާ މަސައްކަތް ކުރަނީ ރ. އަތޮޅުގެ ރިސޯޓެއްގައެވެ.

އޭނާ ހޯދުމުގެ މަސައްކަތް ފުލުހުންނާއި ސިފައިން ގުޅިގެން އަންނަނީ ކުރަމުންނެވެ.

ސްނޯކްލިންއަށް ގޮސް އުޅެނިކޮށް މީގެކުރިން ބައެއް ފަތުރުވެރިންނަށް ހިތާމަވެރި ހާދިސާތަކާ ކުރިމަތިލާންޖެހިފައިވެއެވެ. އެގޮތުން ބައެއް ފަތުރުވެރިން ގެނބިގެން މަރުވެފައެވެ.

މިފަދަ ކަންކަން މަދުކުރުމަށްޓަކައި ފަތުރުވެރިން މޫދަށް އެރުމުގެ ކުރިން މޫދަށްއެރި އުޅުމުގައި އަމަލުކުރަންޖެހޭ ފުރިހަމަ އިރުޝާދުތައް ދިނުމަށް ކަމާބެހޭ ފަރާތްތަކުން އިލްތިމާސްކުރެއެވެ.