ރިސޯޓު މުވައްޒަފުންނަށް ތުނބުޅި ނުބެހެއްޓޭތީ އެމްޑީޕީގެ ގަރާރެއް ހުށައަޅައިފި

ޓޫރިޒަމް ދާއިރާގައި މަސައްކަތް ކުރާ މުވައްޒަފުންނަށް ތުނބުޅި އާއި މަތިމަސް ނުބެހެއްޓޭތީ، އެކަން ހައްލު ކުރުމަށް ގޮވާލައި، ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

މި މައްސަލަ މަޖިލީހަށް ހުށައަޅާފައިވަނީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރެވެ.

ތުނބުޅި، މަތިމަސް ނުބެހެއްއްޓުމަކީ ފަތުރުވެރިކަމުގެ ސިނާއަތުގައި މަސައްކަތް ކުރަން ބޭނުންވާ ރައްޔިތުންގެ ތެރެއިން ބުރުގާ އަޅައިގެން ނުވަތަ ތުނބުޅި މަތިމަސް ބަހައްޓައިގެން ތިބޭ ފަރާތްތަކުގެ މަސައްކަތް ކުރުމުގެ ހައްގަށް ހުރަސް އެޅޭ ކަމެއް ކަމަށް މައުރޫފް ހުށަހެޅުއްވި ގަރާރުގައި ބުނެފައިވެއެވެ.

މި ހުރަސްތައް ނައްތާލާ ޓޫރިޒަމް ވިޔަފާރިތަކުގައި މަސައްކަތް ކުރާ މުވައްޒަފުން އަމަލު ކުރާނެ ގްރޫމިން ސްޓޭންޑަޑަކާއި ޑްރެސްކޯޑެއް އެކުލަވާލުމަށް އެ ގަރާރުގައި ވަނީ ސަރުކާރަށް ގޮވާލައިފައެވެ.

ޓޫރިޒަމް އެމްޕްލޯއީޒް އެސޯސިއޭޝަން އޮފް މޯލްޑިވްސް (ޓީމް) އިން 11،000 އަށް މީހުން ބައިވެރިކޮށްގެން ހެދި ސާވޭއެއްގައި 93 ޕަސެންޓު މުވައްޒަފުން އެކަށީގެންވާ މިންވަރަކަށް ތުނބުޅި ބަހައްޓަން ބޭނުންވާ ކަން އެނގުނުކަމަށް މައުރޫފް ވިދާޅުވިއެވެ.