އަނެއްކާވެސް މުޑުދާރު ކެފޭއެއް ފެނިއްޖެ، 11 މީހުން އިމިގްރޭޝަންގެ ބެލުމުގެ ދަށަށް

މާލޭގައި ވަރަށް މުޑުދާރުކޮށް ހިންގަމުން އައި ކެފޭއެއް ބަލައިފާސްކޮށް 11 މީހަކު އިމިގްރޭޝަންގެ ބެލުމުގެ ދަށަށް ގެނެސްފިއެވެ.

އިމިގްރޭޝަނުން ރޭ ކުރިއަށްގެންދިޔަ އެ އޮޕަރޭޝަންގެ ވީޑިއޯ އެކްސްގައި މިހާރު ވަނީ އާންމުކޮށްފައެވެ. އެ ވީޑިއޯއިން ފެންނަގޮތުގައި އެ ކެފޭގެ ބަދިގެ އޮތީ ވަރަށް މުޑުދާރުކޮށެވެ. އެ ބަދިގެ ހުރީ ހެލްތު ޕްރޮޓެކްޝަން އެޖެންސީން ކަނޑައަޅާފައިވާ ސާފުތާހިރު ކަމުގެ މިންގަނޑާ ކަނޑައެޅިގެން ޚިލާފަށެވެ.

މީގެކުރިން ވެސް އިމިގްރޭޝަނުން ވަނީ މިފަދަ ތަންތަން ބަލައިފާސްކޮށް ގަވާއިދާ ޚިލާފަށް އުޅުނު ބިދޭސީންތަކެއް އެ އިދާރާގެ ބެލުމުގެ ދަށަށް ގެންގޮސްފައެވެ.

ގަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރަމުން އަލަށް ފެށި އޮޕަރޭޝަންގެ ދަށުން މިހާތަނަށް 5000އަށްވުރެ ގިނަ މީހުން ވަނީ ޑީޕޯޓްކޮށްލާފައެވެ.

އެންމެ ފަހުގެ ބޯހިމެނުމުން އެނގޭގޮތުގައި ރާއްޖޭގައި ޖުމްލަ 132،371 ބިދޭސީން އެބަތިއްބެވެ.