އަހްމަދިއްޔާ އިންޓަނޭޝަނަލް ސްކޫލު އޮޑިޓު ކުރަން މިނިސްޓްރީން އެދިއްޖެ

އަހްމަދިއްޔާ އިންޓަނޭޝަނަލް ސްކޫލު އޮޑިޓު ކުރަން އެޑިއުކޭޝަން މިނިސްޓްރީން އޮޑިޓާ ޖެނެރަލް އޮފީހުގައި އެދިއްޖެއެވެ.

އެނގިފައިވާ ގޮތުގައި އަހްމަދިއްޔާ ސްކޫލު އޮޑިޓު ކުރަން ހުށައަޅައިފައިވަނީ އެ ސްކޫލް އަވަށު މަދަރުސާއެއްގެ ގޮތުގައި ހިންގަމުން އައިސް އިންޓަނޭޝަނަލް ސްކޫލަކަށް ބަދަލު ކޮށްފައިވަތީ, އެ ސްކޫލުގެ ހިންގުމާމެދު ގިނަ ބަޔަކު ކަންބޮޑުވުން ފާޅުކުރަމުން އަންނާތީއެވެ.

އެހެންކަމުން ސްކޫލުގެ މާލީ އަދި ހިންގުމާ ބެހޭ ކަންކަން އޮޑިޓު ކުރުމަށް ހުށައެޅީ ހަޔާ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އެވެ.

ދައުލަތުގެ ބިމެއްގައި ހިންގަމުން އަންނަ އަހްމަދިއްޔާ ސްކޫލުގެ ހިންގުމާބެހޭ ކަންކަން ނިންމަނީ ސްކޫލުގެ ބޯޑުންނެވެ.އަދި މިނިސްޓްރީގެ ބައިވެރިވުމެއް ސްކޫލު ހިންގުމުގައި ނޯންނަ ކަމަށް މައުލޫމާތު ލިބެއެވެ. އަދި އާންމު އުސޫލުންނަމަ އަވަށު މަދަރުސާތައް ހިންގާ މާލެ ސިޓީ ކައުންސިލުގެ ވެސް އެއްވެސް ބައިވެރިވުމެއް އަހްމަދިއްޔާ ސްކޫލުގައި ނޯވެއެވެ.

ސްކޫލު ހިންގުމަށްޓަކައި ދަރިވަރުން އަތުން ފީ ނެގިކަމުގައިވީ ނަމަވެސް އެ ސްކޫލުގެ ދަރިވަރުން އޯލެވެެލް އަދި އޭލެވެލް އިމްތިހާނުގައި ބައިވެރިވުމަށް ވެސް ހަރަދު ކުރަނީ ސަރުކާރުންނެވެ.