ހަބީބް ކޮމިޝަނުން އިސްތިއުފާ ދިނީ ރައުދުއާ އާއިލީ ގުޅުން އޮންނާތީ

މާލޭގެ އިމާރާތަކުން ޒުވާން އަންހެނަކު ވެއްޓުނު މައްސަލައިގައި އެ މައްސލަަ އިންސާފުވެރިކަމާއެކު ތަހުގީގު ކުރަން ރައީސް ޑރ. މުހައްމަދު މުއިއްޒު އެކުލަވާލެއްވި ރިޔާސީ ކޮމިޝަނުން ޑރ. މުހައްމަދު ހަބީބް މިއަދު އިސްތިއުފާ ދެއްވައިފި އެވެ.

މައުލޫމާތު ލިބިފައިވާގޮތުގައި ޑރ ހަބީބް ކޮމިޝަނުން އިސްތިއުފާދެއްވާފައި ވަނީ މައްސަލައިގައި ތުހުމަތު ކުރެވޭ، ރައުދު އަހްމަދު ޒިލާލް އާ އާއިލީ ގުޅުން އޮންނާތީއެވެ.

އެކުލަވާލެވުނު ކޮމިޝަނުގައި ހިމެނެނީ ހަބީބް ގެ އިތުރުން ދެ މެންބަރުންނެވެ. އެއީ ޑރ މުޙައްމަދު މުނައްވަރު އާއި ބްރިގޭޑިއަރ ޖެނެރަލް ރިޓަޔަޑް އަޙްމަދު މުޙައްމަދު އެވެ.

ހަބީބް އަކީ ރާއްޖޭގެ ނަން މަޝްހޫރު ކަށީގެ ޑޮކްޓަރެކެވެ. އޭނާ ކޮމިޝަނުން ވަކިވީ ކޮމިޝަން އެކުލަވާލިތާ ދެ ދުވަސް ފަހުންނެވެ.