ފަސް މީހުންނާއެކު ދަތުރުކުރި ގައްދޫ ދޯންޏެއް ގެއްލިއްޖެ

ފަސް މީހުންނާއެކު ދަތުރުކުރި ގދ. ގައްދޫ ދޯންޏެއް ގެއްލިއްޖެ އެވެ.

ފުލުހުންގެ މީޑިއާ އޮފިޝަލް ވިދާޅުވީ ރޭ 8:00 ހާއިރު ގައްދުއިން ހުޅުމާލެއަށް ދަތުރުކުރި "ބްރިލިއަންޓް ކެރިއަރ" ނަމަކަށް ކިޔާ ދޯންޏަށް އެންމެފަހުން ގުޅިފައި ވަނީ ރޭ ދަންވަރު 2:40 ހާއިރު ކަމަށެވެ.

އެ ދޯނީގައި ތިބީ ފަސް މީހުންނެވެ. އެއީ ތިން ދިވެހީންނާއި ދެ ބިދޭސީން ކަމަށް ފުލުހުން ބުންޏެވެ.

އެ ދޯނި ގެއްލުނު މައްސަލަ ގައްދޫ ޕޮލިސް ސްޓޭޝަނަށް ހުށަހެޅީ މިއަދު ހަވީރު 6:00ގައެވެ. އެ މައުލޫމާތު މިހާރު ސިފައިންނަށް ދީފައިވާ ކަމަށް ވެސް ފުލުހުން ބުންޏެވެ.

އެ ދޯނި ހޯދުމުގެ މަސައްކަތް ސިފައިންނާއި ފުލުހުން އަންނަނީ ކުރަމުންނެވެ.

އެ ދޯންޏާ ބެހޭ އެއްވެސް މައުލޫމާތެއް ލިބިފައިވާނަމަ، ނެޝަނަލް އިމަޖެންސީ ނަންބަރު 911 އަށް ނުވަތަ އެންމެ ކައިރި ރަށެއްގެ ޕޮލިސް ސްޓޭޝަނަކަށް ގުޅައި އެ މައުލޫމާތު ހިއްސާކޮށްދިނުމަށް ފުލުހުން ވަނީ އެދިފައެވެ.