ރައީސް މެލޭޝިއާއަށް ކުރެއްވި ރަސްމީ ދަތުރުފުޅު ނިންމަވައިލައްވައިފި

މެލޭޝިއާއަށް ރައީސް ޑރ. މުހައްމަދު މުއިއްޒު ކުރެއްވި ފުރަތަމަ ރަސްމީ ދަތުރުފުޅު ނިންމަވާލައްވައި އެނބުރި ރާއްޖެ ވަަޑައިގެންފިއެވެ.

މިއީ މެލޭޝިއާގެ ބޮޑުވަޒީރު އަންވަރު އިބްރާހިމްގެ ދައުވަތަކަށް ރައިސް މެލޭޝިއާއަށް ވަޑައިގެންނެވީ މި މަހުގެ 27 ވަނަ ދުވަހުއެވެ. މި ދަތުރުގެ ތެރެއިން ރައީސް ވަނީ މެލޭޝިއާގެ ސަރުކާރުގެ އިސްވެރިންނާ ބައްދަލުކުރައްވައި ދެ ގައުމުގެ ގުޅުން ބަދަހިކޮށް, މުހިންމު މަޝްވަރާތަކެއް ކުރައްވާފައެވެ. އަދި ފަސް ދާއިރާއަކުން ވަނީ އެއްބަސްވުންތަކެއް އެކުލަވާލާފައެވެ.

އެގޮތުން ޖުމްލަ ފަސް ދާއިރާއަކުން މީހުން ތަމްރީނުކޮށް އެ ދާއިރާތައް ކުރިއަރުވަން އެއްބަސްވުންތަކުގައި ސޮއި ކުރެވުނެވެ. އެއީ،

1. ކުޅިވަރުގެ ދާއިރާ
2. ސިއްހީ ދާއިރާ
3. ޓޫރިޒަމް ދާއިރާ
4. ޑިޕްލޮމެޓުން ތަމްރީނުކުރުން
5. ފައިނޭސްޝަލް ސާވިސަސްގެ ދާއިރާ، އެވެ.

މީގެ އިތުރުން ޑިފެންސްގެ ދާއިރާއިން ވެސް މެލޭޝީއާ އޮންނަ ގުޅުން ބަދަހިކުރުމަށް ޝައުގުވެރިކަން އޮތް ކަން ރައީސް ވަނީ ހާމަކުރައްވާފައެވެ.

މި ދަތުރުގައި އިންވެސްޓްމެންޓް ފޯރަމްގައި ބައިވެރިވެ ރާއްޖޭގައި އިންވެސްޓްކުރެވެންހުރި ފުރުސަތުތަކާ ބެހޭ މައުލޫމާތު މެލޭޝިއާގެ އިންވެސްޓަރުންނަށް ފޯރުކޮށްދެވުނެވެ. އަދި މެލޭޝިއާގައި ދިރިއުޅޭ ދިވެހިންނާ ބައްދަލުކުރައްވައި, އެ ބައްދަލު ކުރެއްވުމުގެ ތެރެއިން މެލޭޝިއާގައި ދިވެހި އައިޑީކާޑާއި ޕާސްޕޯޓް ހެދުމުގެ ހިދުމަތް ރަސްމީކޮށް ފައްޓަވައިދެއްވިއެވެ.

އަދި އިންޓަނޭޝަނަލް އިސްލާމިކް ޔުނިވާސިޓީ އޮފް މެލޭޝިއާ (އައިއައިޔޫއެމް)އިން އޮނަރަރީ ޑޮކްޓަރޭޓްގެ ޝަރަފު ވެސް ރައީސް ޑރ މުހައްމަދު މުއިއްޒަށް ވަނީ އަރުވައިފައެވެ.