މުޒާހަރާއިން ހައްޔަރުކުރި ދެ މީހުންގެ ބަންދަށް ތިން ދުވަސް ޖަހައިފި

މާލޭގައި ޒުވާނުން ރޭ ކުރި މުޒާހަރާއިން ހައްޔަރުކުރި ދެ މީހުންގެ ބަންދަށް ކްރިމިނަލް ކޯޓުން ތިން ދުވަސް ޖަހައިފިއެވެ.

މާލޭގެ ގެއެއްގެ ފުރާޅެއްގެ މައްޗަށް ވެއްޓުނު ޒުވާނާއަށް އިންސާފު ހޯދައިދިނުމަށް ގޮވާލައި ރޭ ކުރި މުޒާހަރާ ވަކި ހިސާބަކުން ފުލުހުން ވަނީ ބާރުގެ ބޭނުންކޮށްގެން ރޫޅާލާފައެވެ.

ފުލުހުން ހައްޔަރުކުރީ މުޒާހަރާގައި އިސްކޮށް ހަރަކާތްތެރިވި އައިޝަތު ޝިމަން އަހްމަދާއި ޔޫތު މިނިސްޓްރީގެ ކުރީގެ ޑެޕިޔުޓީ މިނިސްޓަރު އަބްދުﷲ މަހްޒޫމް މާޖިދެވެ.

"ނުކުތާ"އަށް އެނގިފައިވާގޮތުގައި އެ ދެ މީހުންގެ ބަންދަށް ކްރިމިނަލް ކޯޓުން ވަނީ ތިން ދުވަސް ޖަހާފައެވެ.

އެއްވެސް ޝަރުތަކާ ނުލައި އެ ދެ މީހުން ދޫކޮށްލުމަށް ގޮވާލައި އިދިކޮޅު އެމްޑީޕީން ރޭ ވަނީ ބަޔާނެއް ނެރެފައެވެ.

ސޯޝަލް މީޑިއާގައި ވެސް ގިނަ ބަޔަކު އަންނަނީ އެ ދެ މީހުން ދޫކޮށްލުމަށް ގޮވާލައި އަޑުއުފުލަމުންނެވެ.