މުލީ އެއާޕޯޓަށް އަންނަ ހޮނިހިރު ދުވަހު ދަތުރުތައް ފަށަނީ، މާލެއިން 1،377 ރުފިޔާއަށް ދެވޭނެ

މ. މުލީ އެއާޕޯޓަށް މޯލްޑިވިއަންގެ ދަތުރުތައް އަންނަ ހޮނިހިރު ދުވަހު ފަށަން ނިންމައިފިއެވެ.

މުލީ އެއާޕޯޓްގެ މަސައްކަތް ނިމި މިދިޔަ މަހުގެ 25 ވަނަ ދުވަހު ވަނީ ޓެސްޓް ފްލައިޓް ޖައްސާފައެވެ.

އެ އެއާޕޯޓަށް ކުރާ ފުރަތަމަ ދަތުރު މި މަހު 17ވާ ހޮނިހިރު ދުވަހު އޮންނާނެ ކަމަށް މޯލްޑިވިއަނުން ބުންޏެވެ. މޯލްޑިވިއަނުން ވަނީ އެ ދަތުރުތަކުގެ ޓިކެޓް ވިއްކަން ފަށާފައެވެ.

މާލެއިން ސީދާ މުލީ އެއާޕޯޓަށް ކުރާ ދަތުރެއްގެ އަގަކީ 1،377 ރުފިޔާއެވެ. ދަތުރުގެ ދިގުމިނަކީ 35 މިނިޓެވެ.

މުލީ އެއާޕޯޓަށް ދަތުރު ކުރުމަށް ހަމަޖެހިފައި ވަނީ ކޮންމެ ހަފްތާއެއްގެ ވެސް ހޮނިހިރު ދުވަހު އެކަންޏެވެ.

އެމްޓީސީސީން ތަރައްގީކުރި އެ އެއާޕޯޓްގައި 1200 މީޓަރުގެ ދިގު 30 މީޓަރު ފުޅާ ރަންވޭއެއް ވަނީ ގާއިމްކޮށްފައިވެއެވެ. މީގެ އިތުރުން ޓެކްސީވޭއަކާއި، އޭޕްރަންއެއް ވަނީ ގާއިމްކޮށްފައެވެ.

މިއީ ދައުލަތުގެ ބަޖެޓުން 221.7 މިލިއަން ރުފިޔާ ޚަރަދުކޮށްގެން ހިންގި މަޝްރޫއެކެވެ.