ހިޔާ ޓަވަރު ދޭއްގައި އަލަށް ހަރުކުރި ލިފްޓް ބޭނުންކުރަން ފަށައިފި

ހިޔާ ޓަވަރު ދޭއްގައި ހަރުކުރި އަލަށް ހަރުކުރި ލިފްޓް މިދިޔަ ހޯމަ ދުވަހު ބޭނުންކުރަން ފަށައިފިއެވެ.

ހިޔާ ޓަވަރު އެކަކާއި ދޭއްގެ އިތުރުން ތިނެއްގައި އާ ލިފްޓުތައް ހަރުކޮށް މިދިޔަ އޭޕްރިލް މަހުގެ ހަތް ވަނަ ދުވަހު ވަނީ ޓެސްޓްކުރަން ފަށާފައެވެ.

އެޗްޑީސީގެ އޮފިޝަލަކު "ނުކުތާ"އަށް ވިދާޅުވީ ޓަވަރު އެއްކެއްގައި ހަރުކުރި ލިފްޓް ވެސް ވަރަށް އަވަހަށް ބޭނުންކުރަން ފެށޭނެ ކަމަށެވެ.

އެކި މަރުހަލާތަކަކަށް ބަހާލައިގެން ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ހިޔާގެ ހުރިހާ ޓަވަރެއްގައި އިތުރު ލިފްޓްތައް ހަރުކޮށް މި އަހަރު ނިންމާނެ ކަމުގެ ޔަގީންކަން އެޗްޑީސީން ވަނީ ދީފައެވެ.

ރައީސްގެ ވައުދާ އެއްގޮތަށް ޓަވަރުތަކުގައި ލިފްޓް ހަރުކުރުމުގެ މަސައްކަތް ފެށީ މިދިޔަ އަހަރުގެ އެޕްރީލް މަހުއެވެ. އެއީ 16 ޓަވަރު ހިމެނޭހެން ޖުމްލަ 32 ލިފްޓެވެ.

ލިފްޓްތައް ހަރުކޮށް ނިމުމުން ހިޔާ ފްލެޓްތަކުގެ ލިފްޓަށް ބާރުބޮޑުވާ މައްސަލައަށް ހައްލެއް ލިބޭނެ ކަމަށް ވެސް އެ ކުންފުނިން ބުންޏެވެ.

ހިޔާ ޓަވަރުތަކުގައި ލިފްޓު ހަރުކުރުމުގެ މަސައްކަތް ކުރަނީ ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާ ހަވާލުކޮށްގެންނެވެ. އެއީ ބަލި މީހުން އުފުލޭނެ އިންތިޒާމާއެކު، ސްޓްރެޗާ އެރުވޭގޮތަށް ހުންނަ ލިފްޓުތަކެކެވެ. 14 މީހުންގެ ޖާގައިގެ މި ލިފްޓުތަކުގައި ލޮލަށް ފެނުމުން މަ މަހުރޫމްވެފައިވާ މީހުންނަށް އެނގޭނެހެން ފްލޯ ނަމްބަރު ބްރެއިލް ބޭނުންކޮށްގެން ތައްޔާރުކޮށްފައިވެއެވެ.