ސިންގަޕޫރަކީ ދިވެހިން ތަރައްގީ ތަސައްވުރު ކުރުމުގައި ނަމޫނާއަކަށް ބަލާ ގައުމެއް: ރައީސް

ސިންގަޕޫރަކީ ދިވެހިން ތަރައްގީ ތަސައްވުރު ކުރުމުގައި ނަމޫނާއަކަށް ބަލާ ގައުމެއްކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ސިންގަޕޫރުގެ ރައީސް ތަރްމަން ޝަންމުގަރަނަމް ދެއްވި ޖާފަތުގައި ބައިވެރިވެވަޑައިގެން ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ދެ ގައުމުގެ ދެމެދު ސިޔާސީ ގުޅުން ގާއިމުކުރިތާ 50 އަހަރު ފުރުން ފާހަގަކުރާ މިމުނާސަބު ވަގުތާ ދިމާކޮށް އެ ގައުމަށް ކުރައްވާ މިދަތުރުފުޅާއެކު ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށެވެ.

ސިޔާސީ ގުޅުން ގާއިމްވުމުގެ މާކުރިންވެސް ދިވެހި ދަތުރުވެރިންނަށް ސިންގަޕޫރަކީ މުހިންމު މަންޒިލެއް ކަމަށް އެމަނިކުފާނު ވިދާޅުވިއެވެ. އަދި ފާއިތުވި ދިގު މާޒީގައި އެ ގުޅުންތައް އިތުރަށް ބަދަހިވެ ރާއްޖޭގެ ކުރިއެރުމާއި ތަރައްގީގައި ސިންގަޕޫރަކީ މުހިއްމު ބައިވެރިއެއްކަމަށް ރައީސް މުއިއްޒު ވިދާޅުވިއެވެ.

2004 ވަނަ އަހަރު ކުރިމަތިވި ސުނާމީ ކާރިސާއާއި 2014 ވަނަ އަހަރު މާލެއަށް ކުރިމަތިވި ފެނުގެ ކާރިސާގައި ސިންގަޕޫރުން ދީފައިވާ އެހީތެރިކަން އެމަނިކުފާނު ވަނީ ޝުކުރުވެރިކަމާއެކު ފާހަގަކުރައްވާފައެވެ.

ހުޅުމާލޭގައި އެންމެ ފުރަތަމަ ބިނާކުރި ސްކޫލް ކަމަށްވާ ޣާޒީ ސްކޫލަކީވެސް އެ ގައުމުގެ އެހީތެރިކަމާއެކު ތަރައްގީކޮށްފައިވާ ސްކޫލެއްކަން ވެސް ރައީސް ފާހަގަކުރެއްވިއެވެ.

ރައީސްގެ ވާހަކަފުޅުގައި ސިންގަޕޫރަކީ ދިވެހިން ތަރައްގީއާއި ތަމައްދުން ތަސައްވުރު ކުރުމުގައި މިސާލު ނަގާ ގައުމެއްކަން ފާހަގަކުރެއްވިއެވެ. އަދި އެ ގައުމުން ލިބެން ހުރި ސިއްހީ އަދި ތައުލީމީ ޚިދުމަތްތައް ހޯދާފައިވާ ދިވެހީންގެ ޖީލެއް ގައުމަށް ޚިދުމަތް ކުރަމުން އަންނަކަން އުފަލާއެކު އެމަނިކުފާނު ފާހަގަކުރެއްވިއެވެ.

އެ ރަސްމިއްޔާތުގައި ވާހަކަފުޅުދައްކަވަމުން ސިންގަޕޫރުގެ ރައީސް ތަރްމަން ޝަންމުގަރަނަމް ވިދާޅުވީ، ދެ ގައުމުން އެއް ގައުމު އަނެއް ގައުމުގެ ތަޖުރިބާތައް ބަލައިގަންނަން ޖެހޭ ކަމަށެވެ. އެގޮތުން ރާއްޖެއަކީ ފަތުވެރިކަމުގެ ދާއިރާގައި ބައިނަލްއަގްވާމީގޮތުން ފާހަގަކޮށްލެވޭ ގައުމަކަށްވާއިރު، ސިންގަޕޫރަކީ ވިޔަފާރިއާއި މާލީދާއިރާގައި ކުރިއެރުން ހޯދާފައިވާ ގައުމެއްކަމުން މިދާއިރާތަކުން ދެ ގައުމުން ގުޅިގެން މަސައްކަތްކުރެވިދާނެ ކަމަށް ވިދާޅުވިއެވެ.