ކޮންޓެންޓު ކްރިއޭޓަރުންނަށް ހާއްސަ ލޯނަށް ކުރިމަތިލުމުގެ ފުރުސަތު އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަނުން ހުޅުވާލައިފިއެވެ.

އެ ކޯޕަރޭޝަނުން ބުނީ މި ލުއި ލޯނު ސްކީމްގެ ދަށުން ރަހުނަކާއެކު 500،000(ފައްސަތޭކަ ހާސް) ރުފިޔާ އަދި ރަހުނަކާއި ނުލައި 150،000 (ސަތޭކަ ފަންސާސް ހާސް) ރުފިޔާގެ ލޯނު ދޫކުރާނެ ކަމަށެވެ. އަދި މިއީ %9.5ގެ ޕްރޮފިޓް ރޭޓެއްގައި 6 މަސްދުވަހުގެ ގްރޭސް ޕީރިއެޑަކާއެކު ދޫކުރާ ލޯނެއް ކަމަށާއި, ލޯނު ދެއްކުމަށް 5 އަހަރުގެ މުއްދަތެއް ލިބޭން ކަމަށް ވެސް އެ ކޯޕަރޭޝަނުން ވަނީ ބުނެފައެވެ.

ރައީސް ޑރ މުހައްމަދު މުއިއްޒު ވެސް ވަނީ މީގެ 2 ހަފްތާ ކުރިން އެކްސްގައި ކުރެއްވި ޕޯސްޓެއްގައި ރާއްޖޭގެ ކޮންޓެންޓް ކްރިއޭޓަރުންނަށް ހާއްސަކޮށްގެން ލުއިލޯނު ދިނުމުގެ ހާއްސަ ސްކީމެއް ތައާރަފް ކުރަން ނިންމައިފައިވާ ކަން ހާމަކުރައްވާފައެވެ.

ރާއްޖޭގެ ކޮންޓެންޓު ކްރިއޭޓަރުންނަށް ފުރުސަތުތައް ފަހިކޮށްދީ ރާއްޖޭގެ އުފެއްދުންތެރިކަމުގެ %15 ހިއްސާއަކީ ކްރިއޭޓިވް އިންޑަސްޓްރީއަށް ހެދުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ.