ބ. އޭދަފުށީގެ ރީތި މިސްކިތް ބިނާ ކުރެއްވި މުހައްމަދު އަލީ މިއަދު މެންދުރު ފަހު ނިޔާވެއްޖެއެވެ.

އުމުރުން 89 އަހަރުގައި މުހައްމަދު އަލީ މިދުނިޔެ ދޫކޮށްފައިވަނީ އިންޑިއާގެ ޗެންނާއީގައި ސިއްހީ ފަރުވާ ހޯދަމުން ދަނިކޮށެވެ. އޭނާއަކީ އޭދަފުއްޓަށް އެކި ރޮނގުތަކުން ވަރަށް ގިނަ ހިދުމަތްތަކެއް ކުރައްވާފައިވާ ބޭފުޅެކެވެ. އަދި އޭނާއަކީ އެރަށުގެ ގިނަ ބައެއްގެ ލޯބި ލިބިފައިވާ ބޭފުޅެކެވެ.

މުހައްމަދު އަލީ އެންމެ ބޭނުންވި ކަމަކީ އޭނާ ދުނިޔެ ދޫކޮށް ދިޔުމުގެ ކުރިން އަމިއްލަ ރަށުގައި މިސްކިތެއް ބިނާކުރާށެވެ. އޭނާވަނީ މި ކަން ހާސިލުކުރައްވައިފައެވެ. އޭނާ އެ ރަށުގައި ބިނާކުރެއްވި "މަސްޖިދު މުހައްމަދު އަލީ"އަކީ މިހާރު ރާއްޖޭގެ އެންމެ މަގުބޫލު އެއް މިސްކިތަށް ވަނީ ވެފައެވެ. އެ މިސްކިތުގެ ރީތިކަން ދެކިލަން ގިނަ ބަޔަކު އޭދަފުއްޓަށް ދެއެވެ.