ދެހާސްހަތާވީސް ވަނަ އަހަރުން ފެށިގެން ސަރުކާރު ސްކޫލްތަކަުގެ ޔުނީފޯމުތައް ބަދަލުކުރުމަށް އެޑިއުކޭޝަން މިނިސްޓްރީން ނިންމާ އެ ޔުނީފޯމުތަކުގެ ނަމޫނާތައް ސްކޫލްތަކަށް ފޮނުވައިފިއެވެ.

ސްކޫލްތަކަށް މިނިސްޓްރީއިން ފޮނުވި ސާކިއުލާގައިވާ ގޮތުގައި ޔުނީފޯމުތަށް އެއްގޮތް ކުރުމަށް ވަނީ ނިންމާފައެވެ. އަދި އެއްގޮތް ކުރުމަށް ނިންމައިފައިވަނީ ހަތަރު ކުލައަކަށެވެ. އެއީ ގައުމީ ދިދައިގެ ތިން ކުލަ ކަމަށްވާ ހުދާއި ރަތާއި ފެެހީގެ އިތުރުން އެޑިއުކޭޝަން މިނިސްޓްރީގެ ކުލަކަމަށްވާ ނޫ ކުލައެވެ.

އެޑިއުކޭޝަން މިނިސްޓްރީން ނިންމައިފައިވާ ގޮތުގައި ރަސްމީ ޔުނީފޯމަށާއި އެކްޓިވިޓީ ޔުނީފޯމަށް ވެސް ބަދަލު ގެނެވޭނެއެވެ. އެގޮތުން ރަސްމީީ ޔުނީފޯމަށް ގެންނަށް ނިންމި ބަދަލުތަކުގެ ތެރޭގައި ގަމީސް ހުންނަން ވާނީ ހުދު, ޓީލް ގްރީން ,މަޑު ރަތް ނުވަތަ ސްކައި ބްލޫ ކުލައިގައެވެ. އަދި ފަޓުލޫނު/ސްކާޓް/ސޯޓު ހުންނަން ޖެހޭނީ ކަޅު ނުވަތަ ނޭވީ ބްލޫ ކަލައިން ކަމަށް ވެސް އެ ސާކިއުލާގައިވެއެވެ.

އެ އުސޫލުގައިވާ ގޮތުން ބުރުގާ އަޅާ ދަރިވަރުންނަށް ޔުނީފޯމު ކުލައަށްވުރެ ގަދަ ކުލައެއްގެ ބުރުގާ އެޅޭނެއެވެ. އެ ކުލަތަކުގެ ތެރޭގައި ރޯޔަލް ގްރީން ގަދަ ރަތް އަދި ނޭވީ ބްލޫ ހިމެނެވެ.

ސްކޫލް އެކްޓިވިޓީ ޔުނީފޯމު ހުންނަން ވާނީ ސްކޫލް ބޭނުންކުރާ ކުލައަކުންނެވެ.

އެކްޓިވިޓީއާައެކު ލާ ސްކާޓް ނުވަތަ ފަޓުލޫނު ހުންނަން ޖެހޭނީ ކަޅު ކުލައިގައެވެ.

ކޮންމެ ކީސްޓޭޖަކަށް ވެސް އަދި ކޮންމެ ޖިންސަކަށް ވެސް ޔުނީފޯމު ހުންނަންވާ ގޮތުގެ ތަފްސީލު މި އުސޫލުގައި ވަރަށް ރަނގަޅަށް ވަނީ ބަޔާންކޮށްފައެވެ.

ޔުނީފޯމަށް ބޮޑު ބަދަލެއް ގެންނަން ނިންމީ، އެކަމުގައި ސްކޫލުތަކާއި ބެލެނިވެރިންގެ ޝަކުވާ ބޮޑުވުމުން ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވިއެވެ. އަދި މި އުސޫލަށް އަމަލުކުރަން ފެށުމުން ޔުނީފޯމް އަގުހެޔޮވެ،މިކަމުގައި މޮނޮޕޮލައިޒްކުރުން އެއްކޮށް ހުއްޓުވޭނެ ކަމަށް ވެސް މިނިސްޓަރު ވަނީ ވިދާޅުވެފައެވެ.