2 އަހަރު ތެރޭ 9،500 އަށްވުރެ ގިނަ ބިދޭސީން ޑީޕޯޓުކޮށްފިން: އިހުސާން

ނިމުނު ދެ އަހަރުގެ ތެރޭގައި 9،500 އަށްވުރެ ގިނަ ބިދޭސީން ޑީޕޯޓުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ހޯމް މިނިސްޓްރީގެ ދަށުން ހިންގާ އިދާރާތަކާއި އެކު ބޭއްވި ނޫސްވެރިންގެ ބައްދަލުވުމުގައި ބިދޭސީންގެ މައްސަލައިގެ މައުލޫމަތު ހިއްސާކުރައްވަމުން ވަޒީރު އިޙްސާން ވިދާޅުވީ، އޮޕަރޭޝަން ކުރަނގި ފެށި ފަހުން މިހާތަނަށް 200،000 އަށް ވުރެ ގިނަ ބިދޭސީންގެ ބަޔޯމެޓްރިކް ޑޭޓާ ނަގައިފައިވާ ކަމަށެވެ.

އެމަސައްކަތުގެ ތެރެއިން ޖޮއިންޓް ޓާސްކް ފޯސްއިން ކުރިޔަށްގެންދާ އެކި އޮޕަރޭޝަންތަކުގެ ތެރެއިން މިހާތަނަށް 9،500 އަށް ވުރެ ގިނަ ބިދޭސީން ޑީޕޯޓުކުރެވިފައިވާކަން ވެސް ފާހަގަކުރެވިފައެވެ.

އެގޮތުން ސަރުކާރުން އެންމެ ފުރަތަމަ އެ މަސައްކަތް ފެށިއިރު، ބިދޭސީންގެ މައްސަލައަކީ އަޑި ނޭނގޭ ބޮޑު މައްސަލައެއްކަން ފާހަގަކުރައްވައި ވަޒީރު ވަނީ، މިހާރު ކުރެވޭ މަސައްކަތުން އެކަން ޙައްލުކުރުމުގެ މަންޒަރު ފެންނަ ކަން ވެސް ފާހަގަކުރައްވާފައެވެ. އަދި 2027 ވަނަ އަހަރުގެ ކުރިން އެ މަސައްކަތް އެއްކޮށް ނިންމާލެވި، އެ އަހަރުގެ ނިޔަލަށް ބިދޭސީންގެ މައްސަލައަށް ބޮޑު ހައްލެއް ހޯދެވޭނެ ކަމުގެ އުންމީދު އޮތް ކަމަށް ވެސް ވަޒީރު ވަނީ ވިދާޅުވެފައެވެ.