ރައްޔިތުން ރައީސަށް ކުރައްވާ އިތުބާރު ޖަލީލަށްވެސް ކުރައްވަން ޖެހޭ: ނައިބު ރައީސް

ރާއްޖޭގެ ރައްޔިތުން ރައީސް ޑރ. މުޙައްމަދު މުޢިއްޒަށް ކުރައްވާ އިތުބާރު، މާލެ ސިޓީގެ މޭޔަރު ކަމަށް ޕީއެންސީގެ ފަރާތުން ވާދަ ކުރައްވާ މޭޖާ ޖެނެރަލް ރިޓާޔާޑް މޫސާ އަލީ ޖަލީލަށް ކުރައްވަން ނައިބު ހުސައިން މުހައްމަދު ލަތީފް އެދިވަޑައިގަންނަވައިފިއެވެ.

ނައިބު ރައީސް މިހެން އެދިވަޑައިގެންނެވީ، މޫސާ އަލީ ޖަލީލުގެ ކެމްޕެއިން ޖަގަހަ ހުޅުވުމަށްޓަކައި ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އެ ރަސްމިއްޔާތުގައި ނައިބު ރައީސް ވިދާޅުވީ މޫސާ އަލީ ޖަލީލުގެ ހިދުމަތާއި ގައުމުދެކެ ވާ ލޯތްބާއި ދޭތެރޭ އެއްވެސް ޝައްކެއް ނުކުރައްވާކަމަށެވެ.

އަދި ރައްޔިތުންގެ ސުލްހަ މަސަލަސްކަމާއި އަމާންކަން ނެގެހެއްޓުމަށް މޫސާ އަލީ ޖަލީލު ކުރައްވާނެ މަސައްކަތާ ދޭތެރޭވެސް އެއްވެސް ޝައްކެއް ނުކުރައްވާ ކަމަށް އެ މަނިކުފާނު ވިދާޅުވިއެވެ. އަދި ތަރައްގީގައި ރައީސް މުޢިއްޒުގެ އަރިހުގައި އެ މަނިކުފާނުގެ ސްޕީޑުގައި މަސައްކަތް ކުރެއްވުމާއި ދޭތެރޭ ވެސް މޫސާ އަލީ ޖަލީލަށް ޝައްކެއް ނުކުރައްވާ ކަމަށް ވެސް އެމަނިކުފާނު ވިދާޅުވިއެވެ.

މީގެ އިތުރުން ނައިބު ރައިސް ވިދާޅުވީ ކައުންސިލުތަކާއި ސިޓީ ކައުންސިލުތަކަށް ބޭނުންވަނީ ސަރުކާރާއި ގުޅިގެން ރައްޔިތުންނަށް ކަންކަން މަގުފަހި ކޮށްދޭނެ ވެރިންތަކެއްކަމަށެވެ.

އެގޮތުން، ރައީސް މުޢިއްޒުގެ ތަސައްވުރުގައި ކުލަޖައްސުވައިދެއްވުމަށް މާލެ ސިޓީގެ މޭޔަރު ކަމަށް މޫސާ އަލީ ޖަލީލު ހޮއްވަވައިދެއްވުމަށް ނައިބު ރައީސް އެދިވަޑައިގެންނެވިއެވެ.