ފުރަތަމަ ފަހަރަށް ޖުމްހޫރީ ޕާޓީއަށް މާމިގިލީގެ މެޖޯރިޓީ ގެއްލިއްޖެ

ޖުމްހޫރީ ޕާޓީގެ ބޮޑު ތާއީދެއް އޮންނަ އދ. މާމިގިލީގެ މެޖޯރިޓީ ފުރަތަމަ ފަހަރަށް އެ ޕާޓީއަށް ގެއްލިއްޖެއެވެ.

ޖުމްހޫރީ ޕާޓީގެ ލީޑަރު ގާސިމް އިބްރާހިމް ނިސްބަތްވެ ވަޑައިގަންނަވާ މާމިގިލީ ކައުންސިލްގެ މެޖޯރިޓީ މިހާތަނަށް ދަމަހައްޓަމުން އައީ އަބަދުވެސް އެ ޕާޓީންނެވެ. އެހެން ނަމަވެސް, އިއްޔެ ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި އެ ޕާޓީއަށް ލިބުނީ ދެ ގޮނޑިއެވެ.

ހަނި ފަރަގަކުން ޖުމްހޫރީ ޕާޓީއަށް މި ފަހަރު ކާމިޔާބުކުރެވުނީ ކައުންސިލް ރައީސްގެ ގޮނޑިއާއި މެންބަރުކަމުގެ އެއްގޮނޑިއެވެ.

ބާކީ ތިން ގޮނޑީގެ ތެރެއިން ދެ ގޮނޑި ޕީއެންސީން ކާމިޔާބު ކުރިއެވެ. އަދި ބާކީ އެއް ގޮނޑި އެމްޑީޕީއަށް ލިބުނެވެ.

އަންހެންގެ ކޮމިޓީގެ މެޖޯރިޓީ ވެސް ހޯދީ ޕީއެންސީންނެވެ. އެ ކޮމިޓީގެ ފަސް ގޮނޑީގެ ތެރެއިން ކޮމިޓީގެ ރައީސް ހިމެނޭ ގޮތަށް ތިން ގޮނޑި ޕީއެންސީން ވަނީ ހޯދައިފައެވެ.