ރައީސްގެ ތިންވަނަ ރިޔާސީ ބަޔާން އިއްވުން މާދަމާ

މިއަހަރަށް ރައްޔިތުންގެ މަޖިލިސް ހުޅުވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ރިޔާސީ ބަޔާން އިއްވަވާ ޚާއްޞަ ޖަލްސާ މާދަމާ އޮންނާނެއެވެ. މި ޖަލްސާ އޮންނާނީ މާދަމާ ހެނދުނު 9:00 ގައި ރައްޔިތުންގެ މަޖިލިސްކުރާ ގޭގައެވެ.

މި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔާން އިއްވަވާނެއެވެ. މިއީ އެމަނިކުފާނު ވެރިކަމާ ހަވާލުވެވަޑައިގެންނެވިފަހުން އިއްވަވާ ތިންވަނަ ރިޔާސީ ބަޔާނެވެ. ޤާނޫނުއަސާސީގެ 84 ވަނަ މާއްދާގެ ދަށުން، ކޮންމެ އަހަރަކުވެސް ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ޤައުމުގެ ޙާލަތު ބަޔާންކޮށްދީ، ޤައުމުގެ ޙާލަތު އިތުރަށް ރަނގަޅުކުރުމަށްޓަކައި ކުރަންޖެހޭނެކަމަށް ފެންނަ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް ރައީސުލްޖުމްހޫރިއްޔާ އިއްވަވަން ޖެހެއެވެ.

މަޖިލީހުގެ ޤަވާއިދުގައިވާ ގޮތުން، ރިޔާސީ ބަޔާން އިއްވުމުން ރައީސް ނިސްބަތްވާ ޕާޓީ ފިޔަވައި ދެން އެންމެ ގިނަ މެންބަރުން ތިއްބަވާ ސިޔާސީ ޕާޓީއެއްގެ މެޖޯރިޓީ ލީޑަރު ނުވަތަ މައިނޯރިޓީ ލީޑަރު، އެ ބަޔާނަށް ދޭނެ ޖަވާބެއް ތައްޔާރުކުރަން ޖެހެއެވެ. މި ޖަވާބު އެކުލަވާލުމުގައި މަޖިލިސް މެންބަރުންގެ ޚިޔާލާއި ފިކުރު ހޯދަންޖެހޭއިރު، ރިޔާސީ ބަޔާން އިއްވާތާ 14 ދުވަހުގެ ތެރޭގައި އެ ޖަވާބު މަޖިލީހަށް އިއްވަންވާނެއެވެ.

މާދަމާގެ ޖަލްސާއާ ގުޅިގެން ސަލާމަތީ ފިޔަވަޅެއްގެ ގޮތުން މަޖިލިސް އިދާރާ ހިމެނޭ ސަރަހައްދުގެ ބައެއް މަގުތަކުގައި ޕާކުކޮށްފައިވާ އުޅަނދުތައް ނެގުމަށް ދިވެހި ފުލުހުންގެ ހިދުމަތުން ވަނީ އަންގާފައެވެ. ފުލުހުން ބުނީ 2026 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާއާ ގުޅިގެން ބައެއް މަގުތައް ހުސްކުރަން ޖެހޭ ކަމަށެވެ.

އެގޮތުން 2026 ފެބްރުއަރީ 4 ވާ ބުދަ ދުވަހުގެ އިރުއޮއްސި 6:00 ގެ ކުރިން އެ ސަރަހައްދުތަކުން އުޅަނދުތައް ނަގައި ހުސްކުރުމަށް ފުލުހުން ވަނީ އިލްތިމާސްކޮށްފައެވެ.