ހަރުދަނާ ފިޔަވަޅުތަކާއެކު އެސްޑީއެފްއަށް 275 މިލިއަން ޑޮލަރު ޖަމާކޮށްފިން: ރައީސް
އަޙްމަދު ސަދޫފް މޫސާ
SHARE
ސޮވެރިން ޑިވެލޮޕްމަންޓް ފަންޑު (އެސްޑީއެފް) އަށް ޑޮލަރު ޖަމާކުރުން އިތުރުކުރުމަށް ސަރުކާރުން ކަނޑައެޅި ހާއްސަ ސިޔާސަތުގެ ސަބަބުން، އެ ފަންޑުގައި މިވަގުތު 275 މިލިއަން ޑޮލަރު އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިކަން ހާމަކުރެއްވީ މި އަހަރުގެ ރިޔާސީ ބަޔާން އިއްވަވައި ދެއްވަމުންނެވެ.
ރައީސް ވިދާޅުވީ މި ވެރިކަން ފެށުމުގެ ކުރިން އެސްޑީއެފްގައި ހުރި ފައިސާގެ ތެރެއިން ބޭނުންކުރެވެން ހުރީ އެންމެ ދެ މިލިއަން ޑޮލަރު ކަމަށެވެ. ނަމަވެސް ސަރުކާރުގެ އިގްތިސާދީ އިސްލާހީ ފިޔަވަޅުތަކާއެކު، މިއީ ފަހުގެ ތާރީޚެއްގައި އެ ފަންޑުގެ ރިޒާވް މިހާ މައްޗަށް ދިޔަ ފުރަތަމަ ފަހަރުކަން އެމަނިކުފާނު ފާހަގަކުރެއްވިއެވެ.
ރާއްޖޭގެ މާލީ ހާލަތު ރަނގަޅުވަމުންދާކަން ފާހަގަކުރައްވައި ރައީސް ވިދާޅުވީ، ބޭރުގެ ކްރެޑިޓް ރޭޓިން އެޖެންސީތަކުން ވެސް ރާއްޖޭގެ އެސްޑީއެފް ފަންޑު ވަރުގަދަވަމުންދާކަން ފާހަގަކޮށްފައިވާ ކަމަށެވެ. މިއީ ދަރަނި އަދާކުރުމުގެ ގާބިލުކަން އިތުރުކުރުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.
މީގެ އިތުރުން، ރާއްޖޭގެ ރަސްމީ ގްރޮސް ރިޒާވްގެ ތަފާސްހިސާބުތައް ހިއްސާކުރައްވަމުން ރައީސް ވިދާޅުވީ، މިވަގުތު ރިޒާވްގައި 1.13 ބިލިއަން ޑޮލަރު އެބަހުރި ކަމަށެވެ. މިއީ ރާއްޖޭގެ ތާރީޚުގައި ވެސް ރަސްމީ ގްރޮސް ރިޒާވް އެންމެ މައްޗަށް ދިޔަ ފަހަރުކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ރިޔާސީ ބަޔާނުގައި އިގްތިސާދީ ދާއިރާއިން ހޯދާފައިވާ މި ކާމިޔާބީތަކަކީ ދެމެހެއްޓެނިވި ސިޔާސަތުތަކެއްގެ ނަތީޖާކަން ފާހަގަކުރައްވައި، ކުރިއަށް އޮތް ތަނުގައި ވެސް ރާއްޖޭގެ މާލީ ރިޒާވް ވަރުގަދަކުރުމުގެ މަސައްކަތް ކުރިއަށްދާނެ ކަމުގެ ޔަގީންކަން ދެއްވިއެވެ.
