ސަރުކާރުން 10 ރިސޯޓު ހަދައި، ދިވެހީންނަށް ޑޮލަރުން އާމްދަނީ ދެނީ

ކުރިއަށް އޮތް ތިން އަހަރު ދުވަހުގެ ތެރޭގައި މަދުވެގެން 10 ރިސޯޓު ތަރައްގީކޮށް، ދިވެހި ކޮންމެ ރައްޔިތަކީ އެ ރިސޯޓުތަކުގެ ހިއްސާދާރަކަށް ހަދައި، ބޭރު ފައިސާއިން ސީދާ އާމްދަނީ ލިބޭނެ މަގު ފަހިކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާނު ކުރައްވައިފިއެވެ. ރައީސް މިކަން އިއުލާނު ކުރެއްވީ މިއަދު ރިޔާސީ ބަޔާން އިއްވަވަމުންނެވެ.

ރައީސް ވިދާޅުވީ ރާއްޖޭގެ ފަތުރުވެރިކަން 1972 ވަނަ އަހަރު ފެށި، މި ސިނާއަތަށް ބައި ގަރުނުވެގެން ދިޔައިރުވެސް، ރާއްޖޭގެ ގުދުރަތީ ވަސީލަތްތަކުގެ އަސްލު ވެރިން ކަމުގައިވާ ދިވެހި ރައްޔިތުންނަށް މި ސިނާއަތުން ސީދާ ގޮތެއްގައި އެންމެ ލާރިއެއް ވެސް ލިބޭނެ މަގެއް މިހާތަނަށް ފަހިވެފައި ނުވާ ކަމަށެވެ. މިހާރު ކަންކަން އޮތް ގޮތުން ރާއްޖޭގެ ގުދުރަތީ އެސެޓުތައް ދޫކޮށްފައިވަނީ ދިގު މުއްދަތަށް ކަމަށްވެސް އެމަނިކުފާނު ފާހަގަކުރެއްވިއެވެ.

ސަރުކާރުގެ މި ނިންމުމާ ގުޅޭގޮތުން ރައީސް ވިދާޅުވީ، ކެބިނެޓުގައި މަޝްވަރާކުރުމަށްފަހު ސަރުކާރުގެ ކުންފުންޏެއް މެދުވެރިކޮށް 10 ރިސޯޓު ތަރައްގީކުރުމަށް ނިންމާފައިވާ ކަމަށެވެ. މި ރިސޯޓުތަކުން ލިބޭ ފައިދާގެ ބޮޑުބައެއް، އެއްވެސް ރައްޔިތަކު ބާކީ ނުކޮށް، ކޮންމެ ރައްޔިތެއްގެ ބޭންކް އެކައުންޓަށް އަހަރަކު އެއްފަހަރު ބޭރު ފައިސާއިން ޖަމާކޮށްދިނުމަކީ އެންމެ އަދުލުވެރި ގޮތް ކަމަށް ރައީސް ވިދާޅުވިއެވެ.

"ރާއްޖޭގެ ކޮންމެ ރައްޔިތަކީ މި މަޝްރޫއުގެ ދަށުން ތަރައްގީކުރެވޭ ރިސޯޓެއްގެ ހިއްސާދާރެއްގެ ގޮތުގައި ހަމަހަމަކަމާއެކު ގާނޫނަކުން ހަމަޖައްސައި ކަނޑައަޅާނަން،" ރައީސް ވިދާޅުވިއެވެ.

މިއީ ރާއްޖޭގެ ތާރީޚުގައިވެސް ދިވެހި ކޮންމެ ރައްޔިތަކު ސީދާ ހިއްސާދާރަކަށް ހަދައި، ފަތުރުވެރިކަމުގެ ސިނާއަތުން ސީދާ ގޮތުން މާލީ މަންފާ ރައްޔިތުންގެ އެކައުންޓަށް ޖަމާވާން ފަށާނެ ފުރަތަމަ ފަހަރެވެ. މި މަޝްރޫއު ކުރިއަށް އޮތް ތިން އަހަރުގެ ތެރޭގައި ނިންމުމަށް ސަރުކާރުން ވަނީ އަމާޒު ހިފާފައެވެ