އަންނަ އަހަރު މާލެ ވިޔަފާރި ބަނދަރު ތިލަފުއްޓަށް ބަދަލުކުރަނީ

އަންނަ އަހަރުގެ ނޮވެމްބަރު 11 ގައި މާލޭ ވިޔަފާރި ބަނދަރު، ތިލަފުއްޓަށް ބަދަލުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާނު ކުރައްވައިފިއެވެ. މިކަން ހާމަކުރެއްވީ މިއަހަރުގެ ރިޔާސީ ބަޔާން އިއްވަވަމުންނެވެ.

ރައީސް ވިދާޅުވީ ޑޮމެސްޓިކް ޕޯޓު ތިލަފުއްޓަށް ބަދަލުކުރަން ބޭނުންވާ ދެ ކިލޯ މީޓަރުގެ ކީވޯލް އާއި ޕޭވްކުރުމުގެ މަސައްކަތާއި އިމާރާތް ކުރުމުގެ މަސައްކަތްތައް މިއަހަރުގެ މެދުތެރޭގައި ބަޔަކާ ހަވާލުކުރެވޭނެ ކަމަށެވެ. އަދި އެ މަސައްކަތްތައް އެއްކޮށް ނިންމައި، އަންނަ އަހަރުގެ ނޮވެމްބަރު 11 ގައި ބަނދަރު ބަދަލުކުރެވޭނެ ކަމުގެ ޔަގީންކަން އެމަނިކުފާނު ދެއްވިއެވެ.

ވިޔަފާރި ބަނދަރު ތިލަފުއްޓަށް ބަދަލުކުރުމުން ލިބޭނެ ފައިދާތަކަށް އަލިއަޅުއްވާލައްވަމުން ރައީސް ވިދާޅުވީ، މިހާރު ހަތް ދުވަހުން ހުސްކުރެވޭ މުދާ، މި ބަދަލާއެކު 48 ގަޑިއިރުގެ ތެރޭގައި ހުސް ކުރެވޭނެ ކަމަށެވެ.

މީގެ އިތުރުން ބަނދަރުގައި މުދާ ބެހެއްޓޭނެ މުއްދަތު އިތުރުވެ، މުދާ ގެނައުމަށް ހިނގާ ހަރަދުތައް ކުޑަވުމުގެ ސަބަބުން މުދަލުގެ އަގު ހެޔޮވެ އޭގެ ފައިދާ ރައްޔިތުންނަށް ކުރާނެ ކަމަށްވެސް ރައީސް ވިދާޅުވިއެވެ.

މި ބަދަލާއެކު މާލޭގައި ގުދަން ކުރާ މުދާތަކާއި މާރުކޭޓު ސަރަހައްދުގައި ކުރާ ހޯލްސޭލް ވިޔަފާރިތައް ވެސް ތިލަފުއްޓަށް ބަދަލުކުރެވޭނެއެވެ. މީގެ ސަބަބުން މާލޭގެ ކާރޫބާރު ބޮޑު ސަރަހައްދުތަކަށް ލުއި ލިބި، މުދާ އުފުލާ ދޯނިފަހަރަށް މުދާ ބޭލުމަށް މަޑުކުރަންޖެހޭ ވަގުތު ކުޑަވެ، ރަށްރަށަށް މުދާ ގެންދިއުން އަވަސްވެގެންދާނެއެވެ.