މިދިޔަ އަހަރު އެމްއެމްއޭއަށް 500 މިލިއަން ޑޮލަރު މާރުކުރި: ރައީސް

މިދިޔަ އަހަރު ފަތުރުވެރިކަމުގެ ދާއިރާއިން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް މާރުކުރި ޑޮލަރުގެ އަދަދު 500 މިލިއަން ޑޮލަރާ ގާތްކުރާ އަދަދަކަށް އަރާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަހަރުގެ ރައްޔިތުންގެ މަޖިލީހުގެ ހާއްސަ ޖަލްސާގައި ރިޔާސީ ބަޔާން އިއްވަމުންނެވެ.

ރައީސް ވިދާޅުވީ ސަރުކާރުން އަޅަމުންދާ ހަރުދަނާ ފިޔަވަޅުތަކާއެކު ރާއްޖޭގެ މާލީ ހާލަތު މިހާރު ރަނގަޅުވަމުންދާ ކަމަށެވެ. އެގޮތުން ބޭރު ފައިސާއާ ބެހޭ ގާނޫނު ތަންފީޒުކުރަން ފެށިފަހުން، 2025 ވަނަ އަހަރުގެ ޖެނުއަރީން ޑިސެމްބަރާ ހަމައަށް ފަތުރުވެރިކަމުގެ ދާއިރާއިން ޖުމްލަ 492 މިލިއަން އެމެރިކާ ޑޮލަރު އެމްއެމްއޭއަށް މާރުކޮށްފައިވާ ކަމަށް އެމަނިކުފާނު ފާހަގަކުރެއްވިއެވެ. މި ބަދަލާއެކު ރާއްޖޭގެ ރަސްމީ ރިޒާވަށް ބޮޑު ކުރިއެރުމެއް ލިބިފައިވާކަން ރައީސް ފާހަގަކުރެއްވިއެވެ.

"މީގެ ސަބަބުން 2025 ވަނަ އަހަރު ރާއްޖޭގެ ރަސްމީ ރިޒާވް އިތުރުވުމަށް މަގުފަހިވި. މިގޮތުން ބަލާއިރު ރާއްޖޭގެ ރަސްމީ ގްރޮސް ރިޒާވްގައި 1.13 ބިލިއަން ޑޮލަރަށްވުރެ މަތީގައި އެބަހުރި. މިއީ ރާއްޖޭގެ ތާރީހުގައިވެސް ރަސްމީ ރިޒާވް އެންމެ މައްޗަށް ދިޔަ ފަހަރު،" ރައީސް ވިދާޅުވިއެވެ.

ރާއްޖޭގެ އިގްތިސާދީ ހާލަތާ ގުޅޭގޮތުން ވާހަކަދައްކަވަމުން ރައީސް ވިދާޅުވީ، މި ސަރުކާރާ ހަވާލުވިއިރު މާލީ ކަންކަން އޮތީ ބޮއްސުންލާފައި ކަމަށެވެ. ކުރީގެ ސަރުކާރުތަކުން ގެންގުޅުނު ޒިންމާދާރުކަން ކުޑަ ސިޔާސަތުތަކުގެ ސަބަބުން، ބޮޑުއަގުގައި ދަރަނި ނެގުމާއި ފައިސާ ޗާޕްކުރުން އޮތީ ހައްދުފަހަނައަޅާފައި ކަމަށާއި، މި ސަރުކާރުން އިސްކަންދިނީ ފިސްކަލް އަދި ދަރަނީގެ ދެމެހެއްޓެނިވިކަން އިޔާދަކޮށް މެކްރޯ އިކޮނޮމިކް ސްޓެބިލިޓީ ގާއިމުކުރުމަށް ކަމަށް ވިދާޅުވިއެވެ.

އެމްއެމްއޭގެ ތަފާސް ހިސާބުތަކުން ދައްކާގޮތުގައި ރިޒާވް ރަނގަޅުވުމުގެ މައިގަނޑު ސަބަބުތަކުގެ ތެރޭގައި ބޭރު ފައިސާގެ ގާނޫނަށް ގެނައި ބަދަލުތަކާއި، މީރާއަށް ލިބުނު އާމްދަނީ އިތުރުވުމުގެ އިތުރުން ކަރެންސީ ސްވޮޕް ފެސިލިޓީ ހިމެނެއެވެ.

މީގެ އިތުރުން، އަންނަ އަހަރުގެ އޭޕްރީލް މަހު ދައްކަންޖެހޭ ސުކޫކް ރީފައިނޭންސް ކުރުމަށް ސަރުކާރުން ނިންމާފައިވާ ނިންމުމާއެކު، ކުރިއަށް އޮތް ތަނުގައި ރާއްޖެއަށް ވަންނަ ބޭރު ފައިސާގެ މިންވަރު އިތުރުވާނެ ކަމަށް ލަފާކުރެވެއެވެ.