ހަފުތާއަކު އެއްފަހަރު ރައީސާއި، ވަޒީރުން ނޫސްވެރިންނާ ބައްދަލުކުރައްވަނީ

ރައީސް ޑރ. މުހައްމަދު މުއިއްޒު ކޮންމެ ހަފުތާއަކު އެއް ފަހަރު ނޫސްވެރިންނާ ބައްދަލުކުރެއްވުމަށް ނިންމަވައިފިއެވެ.

ރައްޔިތުންގެ މަޖިލިސް މިއަހަރަށް ހުޅުވުމަށް އިއްވެވި ރިޔާސީ ބަޔާނުގައި ވާހަކަދައްކަވަމުން ރައީސް ވިދާޅުވީ ދަތުރަކާ ގުޅިގެން ނުވަތަ ސަރުކާރު ބަންދުވުން ފަދަ ހާލަތެއްގައި ޝެޑިއުލަށް ބުރޫ ނާރާހާ ހިނދެއްގައި އެ މަނިކުފާނު އަންނަ މާޗު މަހުން ފެށިގެން ކޮންމެ ހޯމަ ދުވަހަކު ނޫސްވެރިންނާ ބައްދަލުލުކުރެއްވުމަށް ނިންމަވާފައިވާ ކަމަށެވެ،

"މީޑިއާއާއި އަޅުގަނޑު ސީދާ އޮންނަ ގުޅުން އިތުރަށް ގާތްކުރުމަށްޓަކައި، މީޑިއާއަށް ސީދާ އަޅުގަނޑު މައުލޫމާތު ދިނުމުގެ ގޮތުން މި އަހަރުގެ މާޗު މަހުން ފެށިގެން އާންމު އުސޫލެއްގެ މަތިން އިރާދަކުރެއްވިއްޔާ ކޮންމެ ހަފުތާއެއްގެ ހޯމަ ދުވަހުގެ 10:00 އިން 11:00އަށް ނޫސްވެރިންނާ އަޅުގަނޑު ބައްދަލުކުރާނަން" ރައީސް ވިދާޅުވިއެވެ.

މީގެ އިތުރުން ކެބިނެޓުގެ ހުރިހާ ވަޒީރުންވެ ހަމަ އެ ފަދައިން ހަފުތާއަކު އެއް ފަހަރު ނޫސްވެރިންނާ ބައްދަލުކުރެއްވުމާށް ހަމަޖެހިފައިވާ ކަމަށާއި، އެ ބައްދަލުކުރެއްވުންތަކުގެ ޝެޑިއުލް ރައީސް އޮފީހުން އާންމު ކުރައްވާނެ ކަމަށް ރައީސް ވިދާޅުވިއެވެ.

ރައީސް ވަނީ މީޑިއާއަށް ޖަވާބުދާރީ ވުމުގައި މިދިޔަ އަހަރު ސަރުކާރުުން ކުރި ބައެއް މަސައްކަތްތަކަށް އަލިއަޅުއްވާލައްވާފައެވެ. އެގޮތުން، މީޑިއާތަކަށް ސީދާ ވަޒީރުން 424 ފަހަރު އިންޓަވިއުތަކަށް ވަޑައިގެންފައިވާކަމަށް ރައީސް ވިދާޅުުވިއެވެ. އަދި، ގާނޫނީ ގޮތުން ޖާގަ ތަނަވަސްވެފައިވާ އެންމެ ފުޅާ މިނެއްގައި އާރްޓީއައިތަކަށް ޖަވާބުދާރީ ވަމުންދާކަމަށް އެ މަނިކުފާނު ވިދާޅުވިއެވެ. އެގޮތުން، ރައީސް އޮފީހާއި، މިނިސްޓްރީތަކަށް ހުށަހެޅޭ އާރްޓީއައިތަކުގެ ތެރެއިން 1251 އަކަށް ޖަވާބުދީފައިވާ ކަމަށާއި، އެއީ ހުށަހެޅިފައިވާ އާރްޓީއައި ތަކުގެ 93 ޕަސެންޓުކަމަށް ރައީސް ވިދާޅުވިއެވެ.

ރައީސްގެ ބަޔާނުގައި ވިދާޅުވީ ތެދު ޚަބަރު ފަތުރާ މީޑިއާއެއް ގާއިމުވެފައި އޮތުމަކީ ރައްޔިތުންގެ ހައްގެއް ކަމަށެވެ. އެކަން ކަށަވަރު ކުރުމަށް، ދައުލަތުގެ ބަޖެޓުން މީޑިއާތަކަށް ފައިސާ ދޫކުރަން ފެށުމާއި، އަދި މީޑިއާ ވިލެޖު ތަރައްގީ ކުރުމުގެ މަސައްކަތުގެ މައްޗަށް އެމަނިކުފާނު އަލިއަޅުއްވާލެއްވިއެވެ.