މާލޭ ބޭރު މަގުގައި ހިނގި އެކްސިޑެންޓްގައި 16 އަހަރުގެ ކުއްޖަކު ނިޔާވެއްޖެ!
އަޙްމަދު ޝާބިން
SHARE
ރޭ މާލޭގެ ބޮޑުތަކުރުފާނު މަގުން ބާރު ސްޕީޑްގައި ހިނގި އެކްސިޑެންޓެއްގައި، ސައިކަލު ފަހަތުގައި އިން 16 އަހަރުގެ ފިރިހެން ކުއްޖަކު ނިޔާވެއްޖެއެވެ.
މިހާދިސާ ހިނގާފައި ރޭ ދަންވަރުގެ ވަގުތެއްގައި ބުރިޖުގެ ލައިޓުން މާލެއަށް ފޭބި ސައިކަލެއް ދުވާރުމައްޗަށް އެރުމުން ކަމަށް ފުލުހުން ބުންޏެވެ.
ފުލުހުން ބުނި ގޮތުގައި މި އެކްސިޑެންޓު ހިނގައިގެން ފުލުހުންނަށް ރިޕޯޓްކޮށްފައި ވަނީ ރޭ ދަންވަރު 1:39 ގައެވެ.
އެގޮތުން ފުލުހުން ބުނާ ގޮތުގައި އެކްސިޑެންޓް ހިނގި އިރު ސައިކަލު ދުއްވަން އިންނީ 19 އަހަރުގެ ފިރިހެނެކެވެ. އަދި ފަހަތުގައި އިނީ 16 އަހަރުގެ ފިރިހެން ކުއްޖެކެވެ.
އެކްސިޑެންޓް ހިނގުމާއެކުބއަނިޔާވި ދެމީހުންނަށްވެސް ފަރުވާދިނުމަށް އައިޖީއެމްއެޗަށް ގެންގޮސްފައިވެއެވެ. 16 އަހަރުގެ ފިރިހެން ކުއްޖާ ނިޔާވީ ފަރުވާދެމުންދަނިކޮށެވެ.
ފުލުހުން ބުނީ ސައިކަލު ދުއްވަން އިން މީހާގެ ލައިސަންސު ނެތް ކަމަށެވެ.
އެ މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
