ރާއްޖެއަށް އެތެރެކުރި 2.2 މިލިއަން ރުފިޔާގެ ޑްރަގް އަތުލައިގަނެފި

ރާއްޖެއަށް އެތެރެކުރަން އުޅުނު 2.2 މިލިއަން ރުފިޔާގެ މަސްތުވާތަކެތި ކަސްޓަމްސް އިން އަތުލައިގަނެފިއެވެ.

ވައިގެ މަގުން އެތެއެކުރަން މަސައްކަތް ކުރި 2.2 ކިލޯގެ މިތަކެތި އެއާޕޯޓުން ހިފަހައްޓާ އަތުލައިގަނެފައިވަނީ މިދިޔަ ހުކުރު ދުވަހުއެވެ.

ކަސްޓަމްސްއިން އަންދާޒާ ކުރާ ގޮތުގައި މާކެޓު ރޭޓުން މިތަކެތީގެ އަގު 2.2 މިލިއަން ރުފިޔާއަށް އަރާނެއެވެ. މިއީ "ހެރޮއިން" ނަމަކަށް ކިޔާ ބާވަތެއްގެ މަސްތުވާ އެއްޗެއްކަންވެސް ކަސްޓަމްސްއިން ބުނެފައިވެއެވެ.

މައްސަލައާ ގުޅިގެން ހައްޔަރުކޮށްފައިވަނީ އުމުރުން 38 އަހަރުގެ އަންހެނެއް ކަމަށްވާ ރަންޖިނި ޖީވަނަންތަން ނަމަކަށް ކިޔާ މެލޭޝިއާގެ ރައްޔިތަކާއި ދިވެހި ދެ ފިރިހެނުންނެވެ. އެއީ 29 އަހަރުގެ ގއ. ވާދޫ/ފުރުސަތު، ލޫޠު އިބްރާހީމާއި 21 އަހަރުގެ ގއ. ދާންދޫ ސަންލައިޓްވިލާ، އަޙްމަދު ރިޝްމާހެވެ.

ވެލޭނާ އިންޓާނޭޝަނަލް އެއާޕޯޯޓުން ރަންޖިނި ޖީވަނަންތަން ހައްޔަރުކޮށްފައިވާ އިރު ބާކީ ދެ ދިވެހިން ހައްޔަރުކޮށްފައިވަނީ މާލެ އިންނެވެ.

ރަންޖިނި ޖީވަނަންތަންއާއި ލޫޠު އިބްރާހީމް 15 ދުވަަހަށް އަދި އަޙްމަދު ރިޝްމާހް ފަސްދުވަހަށް ބަންދުކުރުމަށް ވަނީ ކްރި މިނަލް ކޯޓުން އަމުރުކޮށްފައެވެ. ފުލުހުން ދަނީ މިމައްސަލަ އިތުރަށް ތަހުގީގު ކުރަމުންނެވެ.