ލައްކައެއްހާ ރުފިޔާ އޮޅިގެން ނުބައި މީހަކަށް ދިން މައްސަލައެއް

އޮޅިންގެން ނުބައި މީހަކަށް ދެވުނު 94،000 ރުފިޔާ ހޯދައިފިއެވެ.

ފުލުހުން ބުނި ގޮތުގައި މި މަހު 10 ވަނަ ދުވަހު ޓީޖެޓީގައި އޮތް ބޯޓެއްގެ ކެޕްޓަނާ ހަވާލުކުރި 94،000 ދިވެހި ރުފިޔާ ލާފައިވާ ސިޓީ އުރައެއް ލިބެންވާ ފަރާތަށް ނުލިބި ގެއްލިފައިވާ މައްސަލަ ވަނީ 12 ވަނަ ދުވަހު މާފަންނު ޕޮލިހަށް ހުށަހަޅާފައެވެ.

މި މައްސަލައާއި ގުޅުގެން ސީސީޓީ ފުޓޭޖް ބެލުމުން ބޯޓު ދެނެގަނެވިފައި ނުވާތީ އެ ސަރަހައްދަށްގޮސް ފުލުހުން ގޮސް އެ ސަރަހައްދުން އެކި މީހުންނާ ސުވާލުކޮށް މައުލޫމާތު ހޯދައި، ކުރެވުނު މަސައްކަތުން ބޯޓު ދެނެގަނެވި ކެޕްޓަނާ ގުޅިފައިވެއެވެ.

ކެޕްޓަން ބުނީ ބޯޓު އޮތީ ވ. އަތޮޅުގައި ކަމަށާއި މީހަކު ގެނެސްދިން ސިޓީ އުރައެއް ބޯޓުގައި ހުރި ލޮކަރުގައި އޮތްކަމަށެވެ. މި ފައިސާ ވަނީ ފެބުރުވަރީ 23 ވަނަ ދުވަހުގެ ރޭ ކެޕްޓަން ފުލުހުންނާ ހަވާލުކޮށްފައިވެއެވެ.

ފުލުންގެ ތަހުގީގަށް އެނގިފައިވާ ގޮތުގައި މި ފައިސާއަކީ ދ. އަތޮޅުގައި ތަރައްގީކުރާ ރިސޯޓެއްގައި މަސައްކަތްކުރާ މުވައްޒަފުންގެ މުސާރައެވެ.

އެހެން ނަމަވެސް ރިސޯޓަށް ފޮނުވުމަށްޓަކައި ފައިސާ ހަވާލުކުރެވިފައިވަނީ ހަވާލުކުރަންޖެހޭ ބޯޓުގެ ކެޕްޓަން ނޫން އެހެން ބޯޓެއްގެ ކެޕްޓަނާކަން އެނގިފައިވެއެވެ.

ފުލުހުން ވަނީ ނަގުދު ފައިސާ ހަވާލުކުރާއިރު، ހަވާލުކުރާ ފަރާތަކީ ކާކުކަން ޔަގީންކުރުމާއި، ބޯޓުގެ ނަމާއި ގުޅޭނެ މައުލޫމާތު ކަށަވަރުކުރުމުގެ އިތުރުން، ފައިސާ ހަވާލުކުރިކަމުގެ ލިޔުމެއް ނުވަތަ ޑިޖިޓަލް ކަށަވަރުކުރުމެއް ހޯދުމަކީ މިފަދަ ކަންކަން މަދުކުރުމަށް ކުރެވިދާނެ ކަމެއް ކަމަށް ބުނެ ނަސޭހަތްތެރިވެފައެވެ.