ޑްރަގު ބޮޑުންކަމަށް ބުނި މީހުންގެ މައްޗަށް ހެކި ނުލިބުމުން ދޫކޮށްލަނީ

މަސްތުވާތަކެތީގެ ބޮޑު ނެޓްވޯކެއްގެ އިސް ބައެއް ކަމަށް ތުހުމަތުކޮށް ފުލުހުން ހައްޔަރުކުރި މީހުންގެ މައްޗަށް ކުށް ސާބިތުކުރެވޭ މިންވަރަށް ހެކި ނުލިބުމުގެ ސަބަބުން އެމީހުން ބަންދުން ދޫކޮށްލުމަށް ޕްރޮސެކިއުޓަރު ޖެނެރަލް (ޕީޖީ) އޮފީހުން ނިންމައިފިއެވެ.

މިދިޔަ ޑިސެންބަރު މަހުގެ ތިންވަނަ ދުވަހުގެ ރޭ ހިންގި ހާއްސަ އޮޕަރޭޝަނެއްގައި ހައްޔަރުކުރި މި މީހުންނަކީ ޑްރަގް ނެޓްވޯކެއްގެ އިސްވެރިން ކަމަށް ފުލުހުން ކުރިން ވަނީ ބުނެފައެވެ.

މި މައްސަލައިގައި ހައްޔަރުކޮށްފައިވަނީ މުޅިންވެސް އައްޑޫ ސިޓީ ހިތަދުއަށް ނިސްބަތްވާ ފަސް މީހެކެވެ. އެއީ ސ. ހިތަދޫ ކޮންމުލި، ޢަލީ ނަދީމް (30އ)، ފަލާޙް ހާފިޡު ފައުޒީ (31އ)، ވެޔޮފެހެބުރުގެ، އިބްރާހީމް ސިރާޖު (43އ)، ދޮރުފޮތިމާގެ، ޙަސަން ޢަލްފާފް (28އ) އަދި ކެކުރިމާގެ، އަމީން މުޙައްމަދު (23އ) އެވެ. މި މީހުންގެ މައްޗަށް މައިގަނޑު ގޮތެއްގައި ކުރަނީ ކުށް ކުރާ ޖަމާޢަތެއްގައި ބައިވެރިވުމުގެ ތުހުމަތާއި މަނީ ލޯންޑްރިންގެ ތުހުމަތެވެ.

ޕީޖީ އޮފީހުން މިރޭ ބުނީ މި މައްސަލަ ތަހުގީގު ކުރުމަށް ގާނޫނުގައި ކަނޑައެޅިފައިވާ މުއްދަތު ހަމަވުމާހަމައަށް ލިބިފައިވާ ހެކި ގަރީނާ ވަޒަންކޮށް ބެލިއިރު، ތުހުމަތުކުރެވޭ މީހުން ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑަރކުރިކަން ގާނޫނީ މިންގަނޑަށް ސާބިތުކޮށްދެވޭ މިންވަރަށް ހެކި ލިބިފައި ނުވާ ކަމަށެވެ.

އަދި ތަހުގީގުގެ މުއްދަތު އެކި ފަހަރުމަތިން އިތުރުކޮށްދިން ނަމަވެސް، އެކަށީގެންވާ ވަރަށް ތަހުގީގު ފުރިހަމަކުރެވިފައި ނުވާކަން ޕީޖީ އޮފީހުން ފާހަގަކުރިއެވެ.

ފުލުހުންގެ ތަހުގީގުން އެނގިފައިވާ ގޮތުގައި މި ނެޓްވޯކުން 2017 ވަނަ އަހަރުން ފެށިގެން މަސްތުވާތަކެތީގެ ވިޔަފާރި ކުރަމުންދިޔައެވެ. އަދި ފާއިތުވި ފަސް އަހަރު ދުވަހުގެ ތެރޭގައި މި ނެޓްވޯކްގެ އިސް ހަތަރު މީހެއްގެ އެކައުންޓްތަކުގައި 19 މިލިއަނަށްވުރެ ގިނަ ރުފިޔާ ދައުރުކޮށްފައިވާކަން ފުލުހުން ކުރިން ހާމަކޮށްފައިވެއެވެ.

މި ނެޓްވޯކްގެ އިސްފަރާތްތަކަށް އަމާޒުކޮށް ފުލުހުން ތަހުގީގު ފަށާފައިވަނީ މިދިޔަ އަހަރުގެ މާޗް މަހުން ފެށިގެންނެވެ.

ޖިނާއީ އިޖުރާއަތުގެ ގާނޫނުގައިވާ ގޮތުން، ތަހުގީގު ކުރުމަށް ކަނޑައެޅިފައިވާ މުއްދަތުގެ ތެރޭގައި ދައުވާކުރެވޭ މިންވަރަށް ހެކި ލިބިފައިނުވާނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަންޖެހެއެވެ. އެހެންކަމުން، މި މައްސަލާގައި ބަންދުގައި ތިބި މީހުން ދޫކޮށްލުމަށް ފުލުހުންނަށް މިހާރު ވަނީ ލަފާދީފައެވެ.

ޕީޖީ އޮފީހުން އިތުރަށް ބުނީ، މިވަގުތަށް ހެކި ނެތުމުން މައްސަލަ ޑިކްލައިން ކުރި ނަމަވެސް، މައްސަލައާ ގުޅުންހުރި އައު ހެކިތަކެއް ލިބިއްޖެ ހާލަތެއްގައި ޖިނާއީ އިޖުރާއަތުގެ ގާނޫނުގެ ދަށުން އަލުން ދައުވާކުރުމަށް ހުށަހެޅުމުގެ ފުރުސަތު އޮންނާނެ ކަމަށް ފުލުހުންނަށް އަންގާފައިވާނެ ކަމަށެވެ.