އެމްޑީޕީން ތިން އިންތިހާބު އެއް ކުރަން ބޭނުންވި، މިހާރު އުޅެނީ ސިޔާސީ ކަމެއް: މަޚްލޫފް

އިންތިޚާބުތައް އެއްކޮށް ބޭއްވުމަކީ މީގެ ކުރިން އެމްޑީޕީން ވެސް ވަކާލާތު ކުރި ކަމެއް ކަމަށާއި، ނަމަވެސް މިއަދު އެކަމާ އެ ޕާޓީން ދެކޮޅު ހަދަނީ ސިޔާސީ ބޭނުމެއްގައި ކަމަށް ޖަޕާނަށް ރާއްޖެއިން ކަނޑައަޅުއްވާފައި ހުންނަވާ ސަފީރު އަޙްމަދު މަޚްލޫފް ވިދާޅުވެއްޖެއެވެ.

ޕީއެންސީގެ ޖަގަހަ ޖަލްސާގައި ވާހަކަފުޅު ދައްކަވަމުން މަޚްލޫފް ވިދާޅުވީ، ރާއްޖޭގެ ވެރިކަމުގެ ނިޒާމާ ބެހޭ ގޮތުން މީގެ ކުރިން ނެގި ވޯޓުގައި ވެސް އެމްޑީޕީން އަމަލުކުރީ މިފަދަ ގޮތަކަށް ކަމަށެވެ. އެގޮތުން ކުރީގެ ރައީސް މައުމޫން އަބްދުލްގައްޔޫމް ބަރުލަމާނީ ނިޒާމަށް ތާއީދުކުރައްވާ ކަމަށް ހީކޮށް އެމްޑީޕީން އެ ނިޒާމަށް ތައްޔާރުވި ނަމަވެސް، ރައީސް މައުމޫން ރިޔާސީ ނިޒާމަށް ތާއީދުކުރެއްވުމުން އެމްޑީޕީން ކުއްލިއަކަށް ބަރުލަމާނީ ނިޒާމަށް ސްޓޭންޑް ބަދަލުކުރި ކަމަށް އޭނާ ފާހަގަކުރެއްވިއެވެ.

މަޚްލޫފް ވިދާޅުވި ގޮތުގައި ރިޔާސީ އިންތިޚާބާއި މަޖިލީސް އިންތިޚާބު އެކުގައި ބޭއްވުމަކީ ކުރީގެ ރައީސް މުހައްމަދު ނަޝީދު ވެސް ތާއީދުކުރެއްވި ކަމެކެވެ. އަދި އޭނާ އެމްޑީޕީގައި ހުންނެވި ދުވަސްވަރު، ރިޔާސީ އިންތިޚާބާއި، މަޖިލީސް އިންތިޚާބުގެ އިތުރުން ލޯކަލް ކައުންސިލް އިންތިޚާބު ވެސް އެއް ދުވަހެއްގައި ބޭއްވުމަށް އެ ޕާޓީން ބޭނުންވި ކަމަށް މަޚްލޫފް ހާމަކުރެއްވިއެވެ.

އިންތިޚާބުތައް އެއްކޮށް ބޭއްވުމުގެ މުހިންމުކަމަށް އަލިއަޅުއްވާލައްވަމުން މަޚްލޫފް ވިދާޅުވީ، މީގެ ސަބަބުން ދައުލަތުގެ ބަޖެޓުން 200 ނުވަތަ 300 މިލިއަން ރުފިޔާ ސަލާމަތް ކުރެވޭނެ ކަމަށެވެ. ރިޔާސީ އިންތިޚާބު ނިމި ހަތަރު މަސް ފަހުން އަނެއްކާވެސް ބޮޑު ޚަރަދެއްކޮށްގެން އިންތިޚާބެއް ބޭއްވުމުގެ ބަދަލުގައި، އެ ފައިސާ ސަލާމަތްކުރުމަކީ ގައުމަށް ލިބޭނެ ބޮޑު ފައިދާއެއް ކަމަށް އޭނާ ވިދާޅުވިއެވެ.

މީގެ އިތުރުން، އިންތިޚާބުތައް އެއްކުރުމުން ވޯޓުލާން ނުކުންނަ މީހުންގެ ނިސްބަތް ނުވަތަ 'ޓާންއައުޓް' އިތުރުވާނެ ކަމަށް ވެސް މަޚްލޫފް ފާހަގަކުރެއްވިއެވެ. ރިޔާސީ އިންތިޚާބެއްގައި އާންމުކޮށް 95 އިންސައްތަ މީހުން ވޯޓުލާން ނުކުންނައިރު، އެއް ދުވަހެއްގައި ވޯޓުލުން ބޭއްވުމުން ރައްޔިތުން ބޭނުންވާ މީހުން އިންތިޚާބު ކުރުމުގެ ފުރުސަތު ބޮޑުވާނެ ކަމަށާއި، ދުނިޔޭގެ އެހެން ގައުމުތަކަށް ބަލާއިރު ސީޝެލްސް، އިންޑޮނޭޝިއާ އަދި އެމެރިކާ ފަދަ ގައުމުތަކުގައި ވެސް އިންތިޚާބުތައް އެއްކޮށް ބާއްވާކަން މަޚްލޫފް ފާހަގަކުރެއްވިއެވެ.

މަޚްލޫފް މިފަދައިން ވިދާޅުވެފައިވާއިރު، ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބު އެއްކޮށްލުމުގެ ވޯޓު އޮންނާނީ ކުރިއަށް އޮތް ހޮނިހިރު ދުވަހުއެވެ. މީގެ ކުރިން އެމްޑީޕީގެ ލީޑާޝިޕްގެ ބޭފުޅުން ކަމަށްވާ ކުރީގެ ރައީސް އިބްރާހިމް މުޙައްމަދު ސޯލިޙް އަދި ރައީސް ނަޝީދު ވެސް އިންތިޚާބުތައް އެއްކޮށް ބޭއްވުމަށް ތާއީދުކުރެއްވި ނަމަވެސް، މިހާރު އެ ބޭފުޅުންގެ ވިސްނުންފުޅު ހުރީ ދެ އިންތިޚާބު ވަކިން ބޭއްވުމަށެވެ.