ބޮޑު ތަފާތަކުން މައި ދެ ޕާޓީ ބަލިކޮށް މާފަރު ކައުންސިލް ރައީސަކަށް މޯޑު ޣަނީ

މައި ދެ ޕާޓީގެ ކެންޑިޑޭޓުން ބަލިކޮށް, މާފަރު ކައުންސިލްގެ ރައީސްގެ ގޮނޑި އަމިއްލަ ގޮތުން ވާދަކުރެއްވި މުހައްމަދު އަބްދުލްޣަނީ (މޯޑު ޣަނީ) ކާމިޔާބުކުރައްވައިފިއެވެ.

މީގެ ކުރިން ޕާޓީތަކުން ދިފާއުކުރަމުން ދިޔަ މާފަރު ކައުންސިލްގެ ރައީސްގެ ގޮނޑި އަމިއްލަ ކެންޑިޑޭޓަކު ކާމިޔާބުކުރި މިއީ ފުރަތަމަ ފަހަރެވެ.

މޯޑު ޣަނީ މި ގޮނޑި ކާމިޔާބުކުރައްވާފައިވަނީ ޕީއެންސީގެ ކެންޑިޑޭޓު އަބްދުލްސަލާމް އަބްދުއްރަހްމާން އަދި އިދިކޮޅު އެމްޑީޕީގެ ކެންޑިޑޭޓު ހަސަން ހުސައިނާ ވާދަކުރައްވައި ބޮޑު ތަފާތަކުންނެވެ. މޯޑުއަށް 363 ވޯޓު ލިބުނުއިރު, އެންމެ ގާތުން ވާދަކުރެއްވި ސަލާމަށް ލިބިވަޑައިގަތީ 253 ވޯޓެވެ. އެމްޑީޕީގެ ކެންޑިޑޭޓަށް ލިބިވަޑައިގަތީ 59 ވޯޓެވެ.

އިއްޔެ ބޭއްވި އިންތިހާބުގައި މާފަރުން ވޯޓު ލުމުގެ ހައްގު 962 މީހަކަށް ލިބުނުއިރު, އޭގެ ތެރެއިން 721 މީހުން ވޯޓު ލާފައިވެއެވެ.